DILI, (timorpost.com)— Komandu Polísia Nasionál Timor-Leste (PNTL) munisípiu Dili, husu ba joven sira atu labele aproveita loron boot simu tinan foun 2024, ho kondisaun lanu kria problema, tanba PNTL sei la tolera kriminozu iha kapitál Dili.
“Ami sei la tolera joven sira ne’ebé aproveita simu tinan foun, ho kondisaun lanu kria fali tan problema, polísia sei la tolera”, Komandante Operasionál PNTL munisípiu Dili, Inspetór Xefe Polísia, José Luis Amaral, informa ba Timor Post iha kuartel PNTL munisípiu Dili, iha Kaikoli, Kuarta, (27/12).
Komandante Operasionál ne’e hatutan foin lalais iha provokasaun mosu konfrontu iha kalan Natál, hodi tuda malu iha fatin balun iha sidade Dili, kuaze identifika joven sira ne’e lanu.
Tanba ne’e komandu orienta ona parte operasionál atu hasa’e patrullamentu iha fatin sira ne’ebé identifikadu rísku ba problema, atu antisipa problema iha kalan simu tinan foun 2024 nian.
“Ami hetan orientasaun sei halo patrulla rutina no rigurozu ba fatin rísku problema, see de’it mak halo problema bainhira simu tinan foun sei simu nia konsikuénsia”, Komandnate Operasionál munisípiu Dili ne’e hatete.
Nia afirma, ema hotu iha nasaun ida-ne’e livre, laiha ema ida atu impede fali ema seluk nia liberdade, liuliu iha sidade Dili, joven sira labele selebra tinan foun ne’e hodi kria fali problema ba malu.
“Husu ba joven sira lanu di’ak liu toba nonok iha uma, duke la’o ba mai provoka fali problema, hodi impede ema seluk nia liberdade, polísia sei lahusik situasaun ida-ne’e akontese”, Komandante José Luis, esplika.
Iha oportunidade ne’e, nia mós husu ba inan-aman sira atu tau atensaun ba oan sira iha festeza simu tinan foun 2024 nian, atu labele la’o tama sai bairru laran ho kondisaun lanu hodi provoka situasaun kria problema ho ema seluk.(*)
13,503 total views, 3 views today
Bele hare Video Seluk :
Subscribe to Timorpost
