DILI, (timorpost.com) — Polísia Nasionál Timor-Leste (PNTL) liuhosi Unidade Polísia Marítima (UPM) mantein vizilánsia iha loron 28 Novembru 2023, iha ne’ebé nu’udar loron ba komemorasaun loron Proklamasaun Independénsia Unilaterál ba dala-48 (28 Novembru 1975-2023).
“Komandu UPM orienta ona membru destakadu iha postu vizilansia ida-idak atu mantein sira nia kontrolu hodi antesipa atividade negósiu ilegál sira ne’ebé tama iha loron Aniversáriu Proklamasaun Independénsia 28 Novembru 2023 ba dala 48 aban”, Komandante UPM, Superintendente Polísia, Eugenio Pereira, informa ba Timor Post iha nia kna’ar fatin, Kuartel UPM Lesidere, Segunda, (27/11/2023).
Nia hatutan, iha selebrasaun loron importante sira ne’e mak negosiante ilegál sira aproveita hodi hatama sasám negósiu ilízitu tama fásil, tanba ne’e Komandu UPM fó orientasaun ba membru UPM destakadu iha postu vizilánsia sira, liuliu iha Batugade, Kom-Lautem, nune’e mós iha Dili laran rasik tenke halo patrullamentu nafatin para atu prevene atividade ilízitu iha kostéira Timor nian.
“Ema ka grupu negósiu ilegál aproveita de’it momentu ida loron Independénsia aban ne’e, sira bele hatama sasán ilízitu sira ne’e mai ita-nia rai-laran, tanba ne’e ami husu membru sira iha postu destakadu, Atabae, Com, Dili no sira seluk atu bele halo patrullamentu rutina, no kontinua vizilánsia ba ema sira komete negósiu ilízitu ne’e labele akontese”, orientasaun Komandante UPM.
Maske aniversáriu loron Proklamasaun Independénsia, UPM haruka pelataun ida partisipa iha isar bandeira maibé kestaun kontrollu konstéira, UPM nafatin halo vizilánsia másimu para antisipa atividade ilegál iha tasi-laran.(*)
1,107 total views, 3 views today
Bele hare Video Seluk :
Subscribe to Timorpost
