DILI (timorpost.com) — Polisia Nasionál Timor-Leste (PNTL), liuhusi Komandu Tránzitu Munisípiu Dili, identifika ona fatin 10 iha area jurídiku Munisípiu Dili, hodi halo pasa revista ba adeptu sira ne’ebé kontra lei kódigu estrada relasiona ho jogu orasida Portugal kontra Korea Selatan iha Kopa Mundiál 2022 iha Qatar.
Komandante Tránzitu Munisípiu Dili, Inspetór Xefe Domingos Sarmento Gama, hatete Komandu Jerál PNTL, halo orden mai iha Komandu PNTL Munisípiu Dili, oinsá mak bele asegura ba atividade adeptu sira, liuliu ba sira ne’ebé barak liu parte husi nasaun Portugal nian.
“Ita hotu hatene, orasida kalan, iha oras 12:00, nasaun rua mak sei joga, nasaun Portugal sei kontra nasaun Korea, tanba ne’e, ita identifika ona fatin 10 iha area jurídiku Munisípiu Dili, hodi halo pasa revista se bainhira iha adeptus balu kontra lei kódigu estada, ita sei prende tan ne’e ita sei halo pasa revista iha oras refere,” dehan Komandante Gama iha nia knaar fatin Komandu Munisípiu Dili, Sesta (02/12).
Nia hatete, iha jogu rua ne’e, sekarik Portugal mak hetan vitória, dala-ruma sei nafatin mosu komboiu husi adeptus Portugal, tanba ne’e sei halo pasa revista.
“Ita halo pasta revista no halo operasaun ne’e, tanba dala-ruma ita-nia adeptu sira kontente demais, entaun dala-ruma sira uza motorizada ho kanu resin no balu mós la uza kapasete no seluk-seluk tan, ita bele dehan viola regra lei kódigu estrada nian,” nia dehan.
Nia haktuir, objetivu husi atuasaun refere maka oinsá bele prevee ba atividade adeptu sira, hodi fó fatin ba komunidade sira ne’ebé merese atu deskansa iha momentu kalan refere, Kada vés adeptu sira reklama sira-nia direita, mais sira rasik haluhan tiha ema seluk nian direitu oras deskansa,” nia afirma.
Tanba ida ne’e, mak komandu iha planu de operasaun, orasida kalan hahú iha tuku 12:00, parte PNTL iha ona planu de operasaun, sei halo operasaun, halo auto stop no mós halo pasa revista iha fatin ne’ebé identifika ona.
“Iha operasaun ne’e kuaze inklui eskuadra sira hotu hanesan Unidade Espesiál Polisia (UEP), Batallaun Orden Públiku, Unidade Patroliamentu Fronteira (UPF) Unidade Patroliamentu Maritima (UPM) no Sentru Formasaun da Polisia.
Tanba ne’e, Komandante Tránzitu Munisípiu Dili, apela dala ida tan ba adeptu sira ne’ebé koko nafatin atu viola regra liuliu lei kódigu estrada, sira sei implementa multa ka selu koimas ho másimu ba adeptu sira ne’ebé koko atu viola lei kódigu estrada.
“Tanba iha artigu 74, ko’alia kona-ba uza kanu resin, tanba ne’e sira ne’ebé uza kanu resin sei selu multa ho osan montante 120 USD, ita laiha toleránsia ba se de’it mak viola regra refere,” nia dehan.
Alende Adeptu nia dehan, adeptu sira ne’ebé espresa sira-nia sentimentu kontente la problema, maibé importante mak la bele viola lei kódigu estrada, nune’e mós la bele hamosu krime ruma hasoru ema seluk.
1,907 total views, 6 views today
Bele hare Video Seluk :
Subscribe to Timorpost
