(Reportajen Jeremias Soares/Editor Mateus da Cruz)
DILI—Komisaun Nasionál Kontra Traballu Infantíl (KNKTI) rejista traballu infantíl kuaze rihun limanulu-resin rua (52) iha territóriu nasionál.
Prezidente Komisaun Nasionál Kontra Traballu Infantíl, Aniceto Leto Soro, hato’o asuntu ne’e hafoin ho ekipa relata servisu kona-ba eliminasaun traballu infantíl iha Timor-Leste ba Prezidente Repúblika José Manuel Ramos Horta iha Pallasu Prezidensiál Bairru-Pité, Segunda (06/06).
“Ohin ami aprezenta rezultadu servisu ne’ebé ami halo, ami halo peskiza nasionál ho kualitativu no kuantitativu ne’ebé ami halo tiha ona iha 2016 no mós iha 2022, eziste traballu infantíl iha Timor-Leste purvolta 52 mill ne’ebé konsidera servisu ne’ebé at hodi prezudika ba sira-nia edukasaun, dezenvolvimentu fíziku no intelektuál, tanba nee, ita presiza tau iha planu asaun nasionál ba kontra traballu infantíl hodi nun’ee bele elimina ou solusaun alternativa saida mak ita bele fó liuliu servisu hamutuk ho liña ministerial kompetente iha area labarik nian”, Aniceto informa.
Aniceto hatete, munisípiu ne’ebé mak rejista barak liu kona-ba traballu infantíl mak Aileu, Ainaru, Ermera, Oekusi no Suai. Labarik sira ne’ebé mak halo servisu nee ho idade 5 to 17.
Tuir Aniceto, sira aprezenta ona planu asaun nasionál kontra traballu infantíl no lista atividade perigozu neebé proibidu traballu infantíl nian ba MKAE, maibé to agora seidauk iha rezultadu.
“Planu nee ho durasaun tinan-lima, sua exelénsia Prezidente iha vontade atu ko’alia ho nai Primeiru, para bele avansa prosesu ida ne’e. Ami mós aprezenta ba sua exelénsia Prezidente, katak ami aprezenta ona lista atividade perigozu ne’ebé proibidu ba traballu infantíl ne’ebé mak iha ona gabinete ministru MKAE nian, ami haree katak presiza mós apoiu ida nee, atu bele aselera para bele ajuda proteje labarik sira liuliu idade minor ne’ebé mak halo servisu”, Aniceto afirma.
Aniceto dehan, iha enkontru nee, konvida mós Prezidente Repúblika atu partisipa iha selebrasaun loron mundiál traballu infantíl nian ne’ebé monu iha loron 12 fulan Juñu, no tuir planu sei realiza iha Munisípiu Covalima-Suai iha loron 15 fulan Juñu ne’e.
980 total views, 3 views today
Bele hare Video Seluk :
Subscribe to Timorpost
