ATAÚRU—Sentru Saúde Maumeta Villa Atauru (SSMVA), iha Janeiru 2024, halo atividade skimming ba komunidade sira identifika moras Mycrobacterium Tuberculosis (TB), konsege rejista ema na’in-171 maka afetadu moras ne’e.
Informasaun ida ne’e Xefe SSMVA, Dano Pires, hato’o ba Timor Post iha nia kna’ar fatin, Sábadu, (10/02/2024).
“Iha tinan 2024, ami halo atividade skrimming ba TB ho objetivu atu redús moras ne’ebé hada’et hósi ema ida ba ema seluk, hamutuk ema na’in-171 maka afeta ba moras refere”, nia informa.
Nia hatete, hosi atividade skrimming ne’e mós pesoál saúde konsege identifika moras sira seluk hanesan dengue no diarreia. Ne’ebé sira sempre kontrolu komunidade halo imunizasaun ba inan isin rua, hodi kontrolu kondisaun.
“Ami mós servisu rotina hodi kontrolu iha terenu, liu liu halo imunizasaun ba inan isin rua sira, atu partus normal entaun iha sentru saude Atauru, karik grave liu transfere ba Dili hodi halo tratamentu iha ne’eba”,Dano Pires hateten.
Aleinde ne’e Dano mós relata, dadus moras Infesaun Sistema Respiratóriu Aguda (ISPA) iha tinan kotuk 2023, maka rejista númeru as liu kompara ho moras sira seluk.
“Iha tinan kotuk 2023, ami rejista moras ne’ebé as liu maka moras ISPA, tuir fali maka diarreia, dengue, moras kulit no moras seluk tan, maibé númeru ladún boot kompara ho moras Ispa”, nia esplika.
Nia afirma, kauza hosi moras ISPA afeta ba komunidade Atauru ne’e, hosi rai rahun, tanba rai mean entaun afeta ba ema nia saúde, maibé agora tempu moras dengue, liu-liu labarik ki’ik sira maka afeta.
Entaun Sentru Saúde ne’ebé nia lidera, daudauk ne’e fasilidade kompletu, inklui ai-moruk sufisiente hodi responde ba pasiente sira, bainhira mai halo tratamentu, maibé sira nia problema maka menus rekursu umanu limite.
Entretantu, Pasiente Miranda Gomes, orgullu ho pesoál saúde sira nia atendementu, tanba maski sira na’in rua de’it maibé konsege halo tratamentu ho di’ak.
“Ami kontente mai halo tratamentu iha ami nia sentru saúde ida ne’e, tanba arendimentu pesoál saúde sira nia di’ak tebes”, Miranda espresa.
Maibé nia sujere, atu aumenta fasilidade no rekursu umanu barak, atu nune’e bele atende lalais pasiente sira, tanba dala barak mai halo tratamentu ba moras hein kleur, tanba pesoál saúde ida rua deit maka atende pasiente.
9,333 total views, 3 views today
Bele hare Video Seluk :
Subscribe to Timorpost
