DILI (timorpost.com)—Koordenadór Unidade Programa Monitorizasaun JSMP, José Pereira, hatete, presiza hadi’a Lei Kódigu Sivíl, tanba viola sidadaun sira nia direitu ba sertidaun kazamentu, liuliu sertidaun kazamentu ba konfisaun relijiaun sira seluk.
“Kuandu ita haree ba ida ne’e ita konsidera katak ita nia estadu ne’e legalmente ita produs lei ida viola fali sidadaun seluk nia direitu. Ne’e halo diskriminasaun boot ida, tanba estadu ne’e labele diskrimina nia sidadaun tuir loloos kala tinan-sanulu-resin ona, kleur ona,” José Pereira hateten iha Parlamentu Nasionál, Kinta (29/02/2024).
Koordenadór Unidade Programa Monitorizasaun ne’e hatutan, JSMP nota katak presiza hadi’a artigu-1.475 hodi bele fó rekoñesimentu ba sidadaun hosi relijiaun hotu-hotu ne’ebé eziste iha Timor-Leste.
“Ita nia kódigu sivíl ne’e rekoñese de’it kazamentu ne’e Katólika, monogámiku, sivíl no barlakeadu, konfisaun sira seluk ninia kazamentu ne’e la rekoñese,” nia esplika.
Tanba ne’e, JSMP produs relatóriu temátiku ida hodi rekomenda mós ba konfisaun relijiozu sira seluk katak iha mós mekanizmu seluk kuandu estadu ida ne’e lakohi altera lei hodi rekoñese konfisaun relijiozu seluk mak hanesan bele hato’o petisaun ba iha ONU hasoru Estadu Timor-Leste, tanba ida ne’e direitu sidadaun nian katak relijioza selu nia direitu ne’e estadu Timor-Leste viola, liuliu liga ba artigu-1.475 Kódigu Sivíl.
JSMP propoin ona opsaun rua, altera previzaun artigu-1.475 hodi rekoñese konfisaun kazamentu relijioza sira seluk ka altera lei ne’e hodi rekoñese kazamentu sivíl de’it ka rejistu sivíl, ne’ebé konfisaun relijiozu hotu atu trata dokumentu ne’e nia aprezenta de’it dokumentu ida mak kazamentu sivíl de’it.
Antes ne’e, Provedoria Direitu Humanu no Justisa (PDHJ) fasilita entre Konfisaun relijiozu sira ho komisaun A trata Asuntu konstitusionál no Justisa hodi hadi’a kódigu sivíl artigu-1.475 kona-ba rekoñesimentu ba sertidaun kazamentu husi konfisaun relijiozu sira seluk. Tanba daudaun ne’e lei kódigu sivíl refere rekoñese de’it sertidaun kazamentu husi relijiaun Katólika.
Daudaun ne’e, konfisaun relijiozu sira ne’ebé eziste iha Timor-Leste mak hanesan, Katólika, Protestante, Musulmanu, Hindu, Buda no Konfuchu.
615 total views, 3 views today
Bele hare Video Seluk :
Subscribe to Timorpost
