DILI (timorpost.com)— Koordenadora Grupu Traballu ba Reforma Setór Justisa, Lúcia Lobato, kestiona servisu Ministériu Públiku (MP) nian ba kazu ró Haksolok ne’ebé Kámara Kontas hato’o ona relatóriu katak iha irregularidade iha prosesu akizisaun.
“Iha relatóriu ne’e, iha ne’ebá konkretamnete ko’alia, iha irregularidade barak mosu, osan gasta la tuir dalan, osan lakon, mas agora MP halo ona saida ho relatóriu sira ne’e? Ita hamutuk ezije tanba saida mak MP la halo tuir rekomendasaun hosi Câmara de Contas”, hato’o Lucia Lobato hafoin partisipa iha lansamentu relatóriu peskiza hosi JSMP, iha Tower Fatu-Hada, Tersa (05/12).
Lucia Lobato mós husu MP tenke halo buat ruma ho relatóriu ne’e. “Sira tenke halo atuasaun, mas nusa mak la halo? Ha’u laiha resposta ba ida ne’e, resposta tenke ba iha autoridade judisiáriu sira ne’ebé mak tuir lei katak sira mak iha kompeténsia atu halo buat ne’e”, hatete eis Ministra Justisa ne’e.
Nia afirma katak bainhira Kámara Kontas fó ninia rekomendasaun, ninia relatóriu iha oin rua, ida se estadu nia osan ba gastu arbiru de’it entaun tenke fó filafali estadu nia osan. Karik iha infrasaun ruma hateten akontese iha krime infrasaun finanseiru entaun MP tenke hodi ema hirak gasta estadu nia osan arbiru ne’e ba hatán iha tribunál.
Responsável grupu traballu enkoraja media sira atu husu MP iha kompeténsia atu hala’o servisu ida ne’e. “Labele mai husu beibeik ba ha’u tanba ita boot sira ba halo ona reportajen barak to’o iha Portugál leno ró ninia kondisaun mas agora imi atu nonook de’it.”
“Ha’u foin lalais la’o ba vizita ona ró Haksolok iha Portugál, tanba ró ne’e gasta ona ita nia osan millaun 30 (30 juta). Ne’e duni tenke ba husu MP, tanba sá maka la halo tuir rekomendasaun sira ne’ebé mai hosi Kámara Kontas”, hatete Lúcia Lobato.
1,069 total views, 3 views today
Bele hare Video Seluk :
Subscribe to Timorpost
