Dili (timorpost.com) — Iha tinan 17 nia laran, Provedoria ba Diretu Humanu no Justisa (PDHJ) simu keixa hamutuk 3744.
“Husi tinan 2005 to’o tinan 2022 PDHJ simu keixa hamutuk 3744, husi keixa 825 ne’e ema ne’ebé kesar na’in ne’e Feto, entaun 2850 ne’e kesar na’in husi Mane,” Provedór PDHJ, Virgílio da Silva Guterres, dehan bainhira partisipa atividade Meet The Prees ne’ebé realiza husi Sekretáriu Estadu Komunikasaun Sosiál (SeKoms), iha Palásiu Governu, Kuarta (08/02).
Nia dehan, iha ne’e mós keixa hamutuk 69 ne’e anonimu, tanba iha Lei PDHJ simu keixa husi sidadaun sira ne’ebé lakohi temi sira-nia naran, tantu keixa husi online ka telefone ne’e sidadaun sira bele hato’o keixa.
“Entaun husi keixa sira ne’e, iha keixa 1496 maka ne’e relasiona ho alegasaun violasaun Direitu Umanu nian. Violasaun Direitu Umanu ne’e komesa husi agresaun fízika, violénsia doméstika ne’e tama iha ne’e. Nune’e mós iha Boa Governasaun nian keixa hamutuk 2112,” Provedór PDHJ, Virgílio esplika.
Kazu hosi tinan 2005 to’o tinan 2022, PDHJ halo fiskalizasaun hamutuk kazu 183 no hato’o ona rekomendasaun hamutuk 461 ba entidade relevante sira.
Portantu depois halo fiskalizasaun no monitorizasaun mai analiza nune’e mak halo rekomendasaun mais rekomendasaun sira ne’e hato’o ona.
Husi keixa sira ne’e, PDHJ iha sistema ida ne’ebé keixa tama iha diresaun Asisténsia Públika ne’ebé atende keixa sira ne’e, depois halo tiha avaliasaun hanesan relatóriu avaliasaun ne’e sei lori ba Komisaun Jestaun Keixa.
“Iha Komisaun Jestaun Keixa ne’e ninia kompozisaun maka provedór, order adjuntu ho diresaun investigasaun, diresaun fiskalizasaun no diresaun atendimentu asisténsia públiku nian,” Virgílio informa.
Entaun sira iha ne’ebá mak sei deside, husi keixa sira ne’e, ida ne’ebé kontinua atu halo hanesan presendimentu ba investigasaun, keixa balu la presiza investigasaun maibé hahú halo referénsia katak, bazeia ba ida ne’e refere ba entidade hodi foti desizaun ruma, nune’e mós iha balu arkiva tanba la’ós PDHJ nia kompeténsia.
“Husi kazu sira ne’e PDHJ mós halo mediasaun, la’ós de’it kazu investiga, la’ós tenke lori ba, mais iha parte balu Provedoria envolve iha mediasaun, entaun iha tinan 2022, ne’e iha mediasaun ne’e hamutuk kazu 105, kompostu husi kazu Direitu Umanu hamutuk 45 no kazu Boa Governasaun hamutuk 60,” nia aprezenta.
893 total views, 3 views today
