DILI, (Timorpost.com)—Ministra Justisa Portugál, Rita Alarcão Júdice, informa, alterasaun lei migrasaun ne’ebé halo iha 03 Juñu tinan 2024 iha Portugál, laiha relasaun ho konfrontu entre joven Timoroan iha Fátima.
“Alterasaun lei migrasaun ne’ebé halo iha loron 03 fulan-Juñu liubá iha Portugál, laiha relasaun ho konfrontu entre joven Timoroan iha Fátima. Alterasaun ne’e preparadu antes ona, no iha programa Governu Portugál nian ne’ebé hatete hakarak iha polítika ida di’ak hodi simu sira ne’ebé imigrante ba Portugál no iha Portugál tempu hirak liubá bainhira governu foun pose, iha problema atrazu barak kona-ba atribuisaun vistu ba ema sira ne’ebé to’o iha Portugál.” Ministra Justisa Portugal, Rita Alarcão Judise klarifika hodi responde jornalista sira hafoin hasoru malu ho Prezidente Repúblika, José Ramos-Horta iha Palásiu Prezidensiál, Díli, Sesta (07/06/2024).
Nia salienta, Portugál tempu hirak liu ba bainhira governu foun simu posse, iha problema atrazu barak-barak kona-ba vistu bainhira ema lubun bo’ot to’o iha Portugál, ne’ebé la hetan akompaña.
“Ho alterasaun lei migrasaun ne’e, ha’u hanoin governu iha objetivu atu integra, simu no halibur imigrante sira espesialmente ba nasaun sira CPLP,” katak nian.
Governate Portugal ne’e hatete, dokumentu sira ne’ebé prepara tiha ona husi governu ko’alia espesifikamente kona-ba reforsa vistu CPLP nian, atu fó resposta ida adekuadu no bele benéfisia imigrante sira ne’ebé iha Portugál.
Antes hakotu Ministra Justisa Portugal ne’e haktuir, situasaun konfronta iha Fatima ne’e, hetan ona tratamentu iha órgaun kompetente, ho ida ne’e hotu-hotu akompaña no hein rezultadu refere.
486 total views, 9 views today
Bele hare Video Seluk :
Subscribe to Timorpost
