DILI (Timorpost.com)—Primeiru-Ministru (PM), Kay Rala Xanana Gusmão, hasoru malu ho Vise-Prezidente Banku Mundiál bá Rejiaun Ázia Orientál no Pasífiku, Manuela Ferro diskute kona ba kooperasaun ne’ebé Banku Mundial ho TL kona ba emprestimu sira ne’ebé IX Governu dehan para lai.
Enkontru ne’e hala’o iha ámbitu konferénsia internasionál tuir Espíritu Bandung iha Bali Nusa Dua Convention Center, Tersa (21/05/2024).
“Hasorumalu koalia kona ba kooperasaun banku mundil ho TL liga ba emprestimu sira IX Governu dehan para lai. Sira komprende tanba bainhira hahú halo emprestimu ita atu poupa k labele hasai kedan osan fundu petróleu, Japaun mak oferese emprestimu. Ida ne’e mos ha’u koalia ona ba nia”. Timor Post asesu hosi mdia GPM, Sesta (24/05/2024).
Xefe Governu hatutan, antes ne’e iha ona diskusaun iha Parlamentu Nasionál (PN) kona-bá osan ida-ne’e hosi empréstimu, no deputadu ida hatán dehan katak, Banku Mundiál mós hakarak, ne’ebé Timor Leste iha ona esperiénsia hosi empréstimu ne’ebé halo ho di’ak.
Kona-bá ne’e, Xanana mós informa ona bá Vise-Prezidente Banku Mundiál bá Rejiaun Ázia Orientál no Pásifiku, Manuela Ferro katak saida mak empréstimu, saida maka uluk halo tiha ona, servisu hotu tiha ona, projetu sira ne’e halo ho di’ak.
“Projetu sira ne’e sei hela hira ha’u la lembra. Ne’e koalia tiha ona ho Ministra Finansas depois ha’u sei tau iha Konsellu Ministru. Se bele karik, tinan mai ne’e saida mak sei iha atu selu empresimu sira uluk ne’e, ita selu tiha kedan ona ba nune’e ita haree fali durante tinan-haat ne’ebe ssei falta ne’e iha projetu estratéjiku importante tebes mak ita bele husu emprestimu. Nia temi kona ba apoiu ba edukasaun, saúde. Neebe hau hatán katk, sim. Obrigado ba imi ni apoiu”. PM Xanana subliña.
Xefe Governu fó hanoin, tenke hatene katak fundu petróleu iha de’it billiaun $18, hosi fundu mina-rai ninian, osan reseita billiaun $9 tanba uluk hosi Ministra Finansas Emilia Pires ho nia hanoin ne’ebé matenek tebes konsege investe osan ida-ne’e hodi hetan fali retornu.
“Agora ita iha billaun $9 hosi investimentu iha bons ne’e. Ho billaun $9 ne’e mak agora ita iha osan billaun $18”. Xanana hatutan.
Primeiru Ministru mós informa bá Manuela Ferro katak, Greater Sunrise iha hela negosiasaun ho Austrália, ho kompañia sira seluk kona-bá taxa, fahe reseita no buat sira ne’e hotu.
Alende ne’e, instalasaun infraestrutura bá Greater Sunrise atu mai iha Suai, Betano no Natarbora sei presiza osan barak, tanba ne’e Xanana Gusmão husu bá Manuela Ferro atu labele preokupa ho investimentu ki’ik sira ne’e, maibé atu haree iha ne’ebé mak Timor-Leste presiza liu, importante tebetebes no estratéjiku tebetebes.
1,011 total views, 3 views today
Bele hare Video Seluk :
Subscribe to Timorpost
