DILI, (timorpost.com), Sekretáriu Estadu Profisionál no Empregu (SEFOPE), Rogério Araujo Mendonça, asina akordu ho Science of Life Studies 24/7 (SoLS) hodi estabelese sentru formasaun lian Inglés no fó vistu espesiál ba voluntáriu internasionál hodi hala’o formasaun lian Inglés iha nível teritóriu Timor-Leste.
“Akordu entre SEFOPE ho SoLS ho objetivu atu apoiu mós sentru formasaun iha kada munisípiu no balun to’o iha postu no mós suku. Joven ne’ebé barak mai buka formasaun iha kapitál, oinsá polítika formasaun nia ne’e lori fila-fali ita-nia joven ba iha munisipiu ida-idak. Ha’u hanoin SEFOPE ne’e atu halo de’it MoU (Memorandum of Understanding) ho SoLS, no SoLS ne’e nia estatutu rasik, formasaun ne’ebé mak SEFOPE sei lansa iha semana rua oin mai, ida-ne’e mak atu hatete, ida-ne’e free (gratuita) ba ita-nia joven sira hotu”, Sekretáriu Estadu SEFOPE, Rogério Araujo Mendonça, informa ba jornlaista sira iha salaun SEFOPE Kaikoli, Kuarta, (07/02).
Governante ne’e hatutan, “Agora ida-ne’e mai ho ninia kompañia no estatutu ne’ebé mak ketak, ami la bele diside. Iha akordu ne’e mós la hatete katak SEFOPE fó fundu ruma ba iha SoLS laiha, maibé hanesan monitoriza ba iha sentru sira iha munisípiu ne’e responsabilidade SEFOPE nia hodi garante kulidade formasaun no mós edukasaun depois sira remata sira-nia formasaun”.
Sekretáriu Estadu ne’e hatete, vistu ba formadór sira ne’e mós espesiál atu nune’e formadór sira fó formasaun ba joven liuliu iha lian Inglés nian iha munisípiu hotu.
“Formadór sira maioria husi rai-liur hanesan Filipina Malázia no Indonézia, intervensaun ne’e ami mós husu ba sira katak atu bele hasai nafatin kualidade no formadór ne’ebé mais kualifikadu”,Governante ne’e akresenta.
Lian Inglés daudauk ne’e importante tebes fasilita joven sira bele hetan servisu iha rai-laran no mós rai-liur tanba ne’e Governu liuhosi SEFOPE kontinua halo esforsu hodi fasilita sentru formasaun bele to’o iha munisípiu no postu hodi fó formasaun ba joven sira.(*)
3,255 total views, 3 views today
Bele hare Video Seluk :
Subscribe to Timorpost
