DILI, (timorpost.com)— Diretór ezekutivu Asia Justice and Rights (AJAR), José Luis de Oliveira, hatete Governu liuhosi Sekretáriu Estadu Asuntu Toponomia no Organizasaun Urbana (SEATOU) labele hasai de’it negosiante ne’ebé hala’o negósiu ka buka moris iha espasu públiku maibé tenke kria kondisaun.
Maske nune’e, AJAR konkorda hasai negosiante husi espasu públiku ne’e programa di’ak maibé tenke kria kondisasun, labele ho intensaun ba hasai de’it.
“Kapitál Dili presiza tenke organizadu no ordenamentu, ema labele mai hela arbiru, entaun Governu tenke halo hanesan ne’e, mais solusaun problema ne’e la’os ba hasai ema de’it, mais presiza kria kondisaun ba komunidade sira molok hasai sira, tanba ema presiza moris. Tanba ne’e, iha estratejia oinsá dezenvolve desentralizasaun iha munisípiu sira ne’e, para depois hasai komunidade sira bele ba buka moris iha ne’eba, lalika hotu-hotu mai buka moris iha Dili”, Diretór ezekutivu AJAR, José Luis de Oliveira, informa ba jornalista sira iha nia kna’ar fatin, Faról, Tersa, (27/02).
Nia hatutan “Governu presiza hatuur orden públiku iha rai ida-ne’e, sasán públiku nian públiku nian no sasán Estadu nian Estadu nian, maibé agora ne’e problema povu sira mai okupa sasán espasu públiku sira hanesan jardim no trotoar sira ne’e tanba sira buka moris, maibé solusaun ba problema ne’e la’os hasai ema, mais kria kondisaun iha munisípu atu ema bele buka moris iha ne’ebá”.
Komunidade tenke buka moris iha espasu públiku no trotoar sira tanba Timor kampu servisu laiha, no daudauk ne’e joven barak mak ba buka servisu iha rai-liur tanba Governu laiha programa konkrtu atu responde ba situasaun sira ne’e. Governu mós la’os ba duni sai negosiante sira de’it sein kria kondisaun di’ak para moris ho dígnu.
Nia hatete, iha Planu Estratéjiku Desenvolvimentu Nasionál (PEDN) katak molok tinan 2030 ema ida-idak iha uma dígnu no asesu eletridade no bee maibé realidade ministériu sira halo progarama dezenvolvimentu tinan-tinan la tuir planu estratéjiku ne’ebé iha ona.
Iha fatin hanesan, Peskizadór AJAR, Inocensio de Jesus Xavier, reforsa atu muda negosiante ne’ebé okupa espasu públiku halo negósiu ne’e la’os SEATOU nia funsaun maibé Prezidente Autoridade Munisipál (PAM) muniípiu Dili ka diretór nia sérvisu, tanba ne’e asaun tékniku la’os polítiku.
Maske nune’e, nia apresia ho serivisu ne’ebé Sekretáriu Estadu halo hodi organiza kapitál Dili sai di’ak liután.
“Ha’u Apresia ba servisu ne’ebé sira halo, mais ha’u la menta uitoan, ita-nia maluk vendór sira iha Aimutin ne’ebé hetan ezekusaun iha semana hirak liubá, horsehik no horbainruak negosiante obralan iha Aimutin ne’e ba butuk malu iha merkadu Manleuana ne’ebé halo espasu ba transporte laiha, iha ne’eba ne’e kuaze la’o ladi’ak, ida-ne’e fó ameasa bele hamosu diskusaun entre vendór sira iha merkadu Manleuana ne’e bele iha problema, tanba vendedór ba uluk ne’e okupa ida kotuk no vendór ikus ba ukupa fali oin, entaun halo ema-nia sasán la folin, ne’e fó impaktu ba konflitu bele mosu” Inocencio hatete.
Nia hatutan “Ha’u apresia sira-nia servisu mais servisu hanesan ne’e la ajuda ita-nia povu atu bele hasa’e sira-nia kresimentu ekonomia, tanba vendór sira ne’ebé fa’an obralan ne’e kréditu, see sira la fa’an tiha semena ida-ne’e see mak atu selu sira”.
Nia hatutan, antes ne’e sosiedade sivíl hato’o tiha ona preokupasaun katak Governu atu hasai vendedór iha Aimutin ne’e tenke kria kondisaun uluk, liuliu prepara fatin maibé laiha, tanba ne’e vendedór Aimutin hamutuk 300 resin daudauk ne’e hadau malu espasu iha merkadu Manleuanna hodi fa’an obralan.(*)
2,835 total views, 3 views today
Bele hare Video Seluk :
Subscribe to Timorpost
