DILI (timorpost.com) — Deputadu Bankada Frente Revolusionáriu Timor-Leste Independente (FRETILIN), Antonino Bianco, afirma reforma Polisia Sientífiku Investigasaun Kriminál (PSIK), tenke ho sentidu.
Nia dehan, atu konkretiza Primeiru Ministru IX Governu Konstitusionál nia deklarasaun kona-ba atu reforma PSIK ne’e, sera-ké atu roka ema ka lei instituisaun nian.
Razaun hirak ne’ebé mak tuir deklarasaun Xefe Governu nian, dehan atu halo reforma ba instituisaun PSIK, tenke ho sentidu, tanba instituisaun hanesan PSIK lei mak regula no lei mak harii instituisaun refere.
“Bainhira reforma tenke ho sentidu, tanba durante ami-nia mandatu iha Oitavu Governu Konstitusionál, haree PSIK servisu tuir lei haruka, no sira servisu ho produtividade”, nia informa ba jornalista sira iha Parlamentu Nasionál, Sesta (07/07).
Nia hatete, lei mak fó dalan ba PSIK hodi halo servisu, no rezultadu servisu mós la’o nafatin, maibé dehan atu reforma tenke ho sentidu tuir lei haruka.
“Ami kontente durante ami-nia mandatu, PSIK halo nia servisu di’ak hodi apoiu ba governu, oinsá fó solusaun ba krime sira iha rai laran. Tanba ne’e mak IX Governu hakarak atu halo reforma ba instituisaun PSIK, tenke tuir lei no hatudu sentidu nasionalizmu”, nia afirma.
Entretantu, Deputadu Bankada Kongresu Nasionál Rekonstrusaun Timorense (CNRT sigla portugés), Domingos Augusto ‘Deker’, hatete deklarasaun husi Primeiru Ministru Kay Rala Xanana Gusmão nian, atu halo reforma ba instituisaun PSIK, tenke la’o tuir lei haruka.
“Ami sempre prontu, hodi hala’o ami nia kna’ar nu’udar reprezentante povu, liuliu atu rezolve problema seguransa ho negósiu estranjeiru nian”, deputadu komisaun B ne’e afirma.
Nia dehan, tuir deklarasaun governu nian karik dehan atu halo reforma ba instituisaun PSIK, haree baze legal ruma, atu aprova ou lae, tuir rejimentu parlamentu Nasionál nian.
“Ita hein programa hothotu husi governu da-sia, karik halo ona programa hodi substitui proposta mai Parlamentu, ita la’o tuir saida mak lei haruka, tanba lei mak importante liu iha Timor-Leste”, nia subliña.
2,484 total views, 6 views today
Bele hare Video Seluk :