DILI—Ministru Administrasaun Estatál, Tomas do Rosário Cabral, hatete, iha funsionariu estadu no funsionariu kazuais, kazuais ne’e regula ho lei rekruta por meritu ne’e buat seluk ida, mai apointment ne’e nia mandatu hotu, hotu ona.
“ha’u de’it mos ha’u ba ho Horta ne’e ha’u reprezentasaun mas nia mos fo kontratu ida mai ha’u mas kontratu remata iha 30 de junhu se ha’u la ba membru governu entaun ha’u tenke hein nia bolu ha’u, hau ba ka,” nia dehan ba jornalista sira iha Palasiu Governu, Kuarta (05/07).
Entretantu Informasaun viral iha mídia sosias katak nunu governu ne’ebé lidera hosi Primeiru Ministru, Kay Rala Xanana Gusmão, ninia membru balun hasai ona funsionáriu kontratadu barak hosi Oitavu Governu nian, hahalok ida ne’e tuir Sosiedade sivil konsidera politika vingansa (balas dendam).
“Ita hare buat ida ne’e hanesan politika iha Indonézia nian lian katak ‘balas dendam’ (vingansa) signifika katak uluk imi halo ona ba ami, imi hasai funsionáriu balun kor la hanesan ho imi, agora ami fali ami halo hanesan ne’e,” Diretór Ezekutivu, Asosiasaun HAK, Feliciano da Costa Araujo, dehan ba Timor Post iha nia knar fatin Farol, Kuarta (05/07).
Nia hatete, hahalok ida hanesan ne’e hatudu imajen ladiak tanba tuir loloos tenke tau nafatin konsiderasaun ba funsionariu sira ne’e, signifika fó nafatin oportunidade ba ema hirak ne’ebé iha kapasidade atu dedika sira nia an ba iha rai ida ne’e, liuliu ba iha setór hirak ne’ebé iha.
“Ita labele atu hatudu ita ninia ego, ho termu seluk tan, dala ruma ita uza odiu vingansa, tanba kor la hanesan, ida ne’e ami haree fó impaktu boot tebes, karik ita liga ba iha desvantagen ne’e boot, ita hasai ema, ita hamosu tan númeru dezempregu ne’e aas,” nia kestiona.
Ligadu ho hahalok ne’ebé iha, signifika Governu dasia kria ona lakuna entre timoroan ho timoroan, signifika katak maski mesak ema timoroan, ko’alia kona-ba unidade nasionál maibé nain ba ukun ida ne’e la tau atensaun ba ida ne’e.
“Ha’u hanoin, atu dehan de’it labele sai hanesan linguazen ida katak ita ko’alia de’it maibé laiha asaun, signifika ita ko’alia unidade nasionál, maibé na-realidade implementasaun ita hatudu hela diskriminasaun iha setór hirak hanesan ne’e, ida ne’e ba ami asosiasaun HAK nian la konkorda,” nia ko’alia.
Iha fatin seluk, Diretór Ezekutivu FONGTIL, Valentim da Costa Pinto, hatete, politika vingansa ne’e la diak, goveru presiza halo prosesu ida ne’ebé nakloke no promove profesionalizmu ba meritu kona-ba kapasidade, atu nune’e ema ne’ebé rekruta bele kontribui ba kontinua haforsa servisu.
“Ministériu labele hasai ema, tanba ema hirak ne’e mesak timoroan oan sira mós iha kapasidade oinsá tenke hasai, tanba sa ita la kontinua haforsa nia knar atu nune’e ita nia servisu ne’e tenke serteza para bele kontribui ba servisu públiku sira bele la’o di’ak,” nia sujere.
Entretantu tuir informasaun ne’eb’e espallha iha midia sosias ministériu hirak ne’eb’e hasai ona funsioinariu kontratadu inklui nomeisaun politika sira maka hanesan ministeriu estatal, ministeriu transporte no komunikasaun.
1,407 total views, 3 views today
Bele hare Video Seluk :