DILI (timorpost.com) – Prezidente Institutu Jestaun Ekipamentu (IJE), Hermenegilda da Costa Laurentina, hatete sira-nia ekipa preparadu hodi tun ba apoiu komunidade sira kuandu situasaun difisil iha tempu udan.
Nia hatete, lia hirak ne’e hafoin hatán kona-ba tempu udan mai daudaun ona, oinsá sira-nia preparasaun hodi halo atendimentu kuandu mosu dezastre ka inundasaun ruma.
“Ita preparasu hela, kuandu udan mai mosu inundasaun ruma ita sei tun ho urjentemente hodi normaliza mota ka ponte sira, nune’e mós kuandu komunidade sira hetan dezastre husu ita-nia apoiu ita ba ajuda sira,” nia hateten, iha Kaikoli, Sesta (21/10).
Nia dehan, relasiona ho ekipamentu ne’e agora sufisiente ona, hodi halo atendimentu ba komunidade sira kompara ho tinan kotuk liubá.
“Ita-nia ekipamentu sufisiente ona, tanba foin daudaun ita sosan tan ona ekipamentu lubuk ida husi Japaun, nune’e mós ita hetan apoiu balun,” deklara nia.
Tanba ne’e, nia dehan ho ekipamentu sira ne’ebé uluk iha no foin daudaun sosa no hetan tan apoiu balun ne’e sufisiente ona hodi halo servisu.
“Maibé ba oin presiza aumenta tan ekipamentu sira, tanba IJE ba oin sei loke tan ba munisípiu sira hotu-hotu, entaun presiza tan mákina no materiál sira seluk,” nia esplika.
1,685 total views, 3 views today
Bele hare Video Seluk :
Subscribe to Timorpost
