(Reportájen Olga Soares/Editor Suzana Cardoso)
DILI (Timor Post) – Artista Juga Gama (41) ne’ebé kumpri hela nia sala tanba halai sai hosi prizaun iha Prizaun Bekora dezde loron 21 Agostu 2020 liu ba, hafoin kondena suspeitu Covid-19 hakotu iis iha Izolamentu Vera Cruz.
“Iha loron loron Tersa, (11/05/2021), ami familía simu informasaun husi Prizaun Bekora katak Prizoneiru hetan moras Dermatolojia (lepra). Guarda prizioneru lori ona ba iha Sentru saúde Bekora hodi hetan tratamentu.”
Esplika Alin husi matebian Juga Gama, Abito Gama ba Jornalista iha izolamentu Vera Cruz, Kinta, (13/05/2021). Nia hateten, husi informasaun ne’e família ba halo vizita iha Sentru Saúde Bekora nia kondisaun diak hela. “Matebian Juga sei koalia didiak ho ami familia,” katak Abito.
Hatutan Abito, iha loron tuir mai matebian dehan rona pesoál saúde sira suspeita ho Covid-19. Nune’e evakua kedas mai iha izolamentu Vera Cruz. No iha Kinta tuku 16:00, simu kontaktu hosi izolamentu dahan dehan Maun Juga hakotu ona iis.
Iha oportunidade ne’e Abito lori familía ho laran luak simu realidade ne’e. No prontu tuir prosesu ka protokolu ne’ebé iha. Desizaun ikus familía hakarak, matebian tenke entrega nune’e familía halot tuir kustumi, hafoin lori ba halot ikus iha Semináriu Bekusi.
“Ami simu kontaktu husi izolamentu tuku 16:30 . Hafoin simu kontaktu, ha’u rasik mai direta iha izolamentu konfirma loos duni Juga Gama laiha duni ona. Matebian antes ne’e moras uituan Lepra no stomach. Maibé ida ataka ikus, familía mós hasoru kedas diretór prizaun hodi esplika matebian pozitivu Covid-19,” tenik Abito ho matan been turuk.
Nia konta, hahú husi loron primeiru matebian hetan ataka, ami akompania kedas nia husi Sentru Saúde Bekora. Iha loron 11 Maiu tuku 17:00 familía lori mai entrega iha izolamentu. Loron rua de’it baixa iha izolamentu matebian iis kotu.
Matebian husik hela fen kaben ho oan nain haat. Matebian iha feton nain neen no maun alin nain lima. Matebian nia Aman Chico Gama artista lendariu fila uluk ona ba Aman Maromak.
Iha fatin hanesan Diretór Estabelesimentu Prizaun Bekora, João Domingos hateten, matebian mate duni ho Covid-19, maibé kona-ba matebian nia istoria moras klínika ne’e doutor sira mak hatene.
“Matebian sai husi prizaun Bekora iha Tersa, (11/05). Hafoin hetan swab teste husi pesoál saúde iha prizaun laran, lori kedas ba iha Sentru saúde Bekora halo ezame ba matebian nia moras deteta Covid-19. Hafoin iha tuku 17:00 ami transfere kedas mai iha izolamentu Vera Cruz. Liu loron rua matebian hakotu iis,” informa João.(Lee notísia kompletu iha Jornál Timor Post)
1,626 total views, 3 views today
Bele hare Video Seluk :
Subscribe to Timorpost
