DILI (timorpost.com)—Relasiona ho preokupasaun povu nian liga ba nesesidade baziku hanesan folin foos ne’ebe daudauk ne’e sa’e makas iha merkadu lokal sira, Primeiru-Ministru (PM), Kay Rala Xanana Gusmão, akompaña hosi Vise-Primeiru Ministru, Ministru Koordenadór Assuntu Ekonómiku, no Ministru Turizmu no Ambiente, Francisco Kalbuadi Lay, tun direta hodi observa foos iha Armazen-tolu.
Armazen foos ne’ebé Primeiru-Ministru vizita maka Sentru Lojístiku Nasionál iha Tibar, munisípiu Liquiça, armazen kompañia LISUN no armazen Perissos iha Hudi-laran.
Objetivu hosi vizita armazen foos ne’e, tanba Xefe Governu hakarak hatene estoke foos iha armazen sira liu-liu foos iha armazen Tibar hodi bele halo intervensaun bá merkadu.
Kay Rala Xanana Gusmão mós orienta Ministériu Komérsiu no Indústria (MCI), atu kontola sirkulasaun foos importadu iha rai-laran no kontrola folin foos tanba foos ho marka Folsom fa’an iha munisípiu ho folin la hanesan, aleinde ne’e tenke kontrola mós kualidade foos.
“MCI tenke kontrola didi’ak foos sira ne’ebe fa’an iha munisípiu tanba ita haree foos Folsom iha armazen barak loos maibe iha foho ne’eba foos la iha no folin boot tebes. Tenke kontrola mos kualidade foos sira ne’e tanba iha foos balun kualidade la di’ak”.PM Xanana hateten hafoin observa armazen Perissos, iha Fatuhada, kuarta (08/05/2024).
Iha fatin hanesan, Diretór Ezekutivu empreza Perissos, James Fu Kong Jong hateten, estoke foos iha armazen sufisiente tebes.
“Ami nia estoke foos iha armazem barak loos. Agora hela tonelada 10.000, ami fa’an ho folin normal”. nia dehan.
Foos sira ne’ebé daudaun iha armazen Perissos ho marka oioin hanesan foos Manu Vitoria, Globus, Amor da Familia no seluk-tán.
Iha armezen LISUN nian daudaun ne’e foos ho marka AAA kuaze tonelada 50 no masin-midar tonelada 10.000 ka saka 23.000.
Iha armazen Tibar, estoke foos importadu hosi Cambodia hamutuk tonelada 4.000 ne’ebé Governu sosa hosi Cambodia bazeia bá akordu ne’ebé Timor-Leste ho Cambodia asina iha loron 20 outubru 2022, hodi halo akizasaun foos no iha tempu hanesan inisiativa ne’e nu’udár kompromisu Governu ne’ebé hatuur iha dekretu-lei númeru 76/2023 kona-bá intervensaun temporária bá estabilizasaun folin foos iha merkadu ne’ebé rai iha armazen CLN.
Hosi akordu ne’ebé selebra entre país rua ne’e Cambodia importa foos tonelada 4.000, ne’ebé daudaun rai iha armazen Tibar.
1,125 total views, 3 views today
Bele hare Video Seluk :
Subscribe to Timorpost
