DILI, (timorpost.com)—Konfederasaun Sindikatu Traballu Timor-Leste (KSTL) mobiliza sindikatu traballadór sira halo asaun pasífiku hodi ko’alia maka’as kona-ba direitu traballadór, liuliu husu Governu hasa’e saláriu mínimu traballadór ba $150 USD no eliminasaun violénsia no asedu iha mundu traballu.
“Ohin ami KSTL mobiliza organizasaun sindikatu traballadór hotu komemora 16 dias ativízmu nian ne’e hakarak ko’alia maka’as liu ba asuntu rua, ida maka ratifikasaun konvensaun 190 kona-ba eliminasaun violénsia no asedu iha mundu traballu, no mós ko’alia kona-ba saláriu mínimu”, Prezidente KSTL, Almerio Villa Nova, informa ba jornalista hafoin akompaña traballadór entrega ezijénsia kona-ba ratifikasaun konvensaun 190 ho saláriu báziku traballadór iha fatin konsentrasaun Largo Lesidere, Segunda, (11/12/2023).
Nia hatutan, “Ita hakarak aprezenta ba ita-nia Governu, ita-nia Estadu atu urjentemente aprova ka revé fila-fali proposta dekretu lei saláriu mínimu ne’ebé mak tinan tolu ba kotuk aprezenta ona ba Governu da-VIII, ne’ebé SEFOPE aprezenta fila-fali ba Governu da-IX ne’e atu iha fin do ano ita-nia Governu bele fó prezente murak ba ita-nia traballadór ho nia família, liuhosi revizaun ba saláriu mínimu bazeia ba proposta ne’ebé maka konsellu nasionál traballu hato’o fulan tolu liu ba”.
Problema salariál ne’ebé la’o daudauk iha Timor-Leste, la dignifika moris traballadór ho nia família iha fulan ida nia-laran, tanba ne’e KSTL hamutuk ho sindikatu traballadór sira ezije órgaun Estadu atu bele konsidera urjentimente revé proposta kona-ba saláriu mínimu nian.
Prezidente KSTL hatete, saláriu mínimu sa’e to’o $150 USD, ne’e haree ba ezijénsia merkadu ne’ebé la’o hela iha rai-laran ho folin sasán ne’ebé laiha kontrolu di’ak husi Governu, ne’e labele sustenta moris traballadór ho nia família.
“Saláriu mínimu $150 USD ne’e seidauk kondis ho moris traballadór sira nian, ita bele dehan katak saláriu $150 USD ne’e sei iha inflasaun nia okos, ne’e labele dignifika moris traballadór hamutuk ho nia família”, Amerio hatete.
Tanba ne’e KSTL sujere saláriu mínimu traballadór nian hasa’e ba $200 USD ba leten kada fulan, atu nune’e dignifika traballadór. Maske nune’e, KSTL husu atu aprova uluk lai proposta ne’ebé iha ona mak saláriu mínimu hasa’e ba $150 USD.
“Ida agora atu hatán uluk ne’e mak aprova lai saláriu mínimu $150 USD, depois Governu halo kedas peskiza saláriu mínimu foun bazeia ba situasaun moris ohin loron nian”, nia esplika.
Tuir KSTL nia haree, povu Timor-Leste ho rendimentu médiu sofre ona iha situasaun ne’e, tanba ne’e Governu presiza rona traballadór sira-nia halerik. Governu iha obrigasaun atu asegura nesesidade báziku povu nian liuhosi hasa’e saláriu mínimu no asegura folin sasán ka nesesidade báziku iha merkadu atu nune’e povu bele kbi’it sosa.(*)
909 total views, 3 views today
Bele hare Video Seluk :
Subscribe to Timorpost
