Dili(timorpost.com)—Komunidade iha suku Mausiga, postu administrativu Hatubuiliku, munisípiu Ainaru, kontinua iha nakukun laran, maski riin eletrisidade kompañia sira ba harii hotu durante tinan ualu ona, maibé instalasaun to’o ohin loron seidauk.
Kondisaun komunidade sira nian buat hotu la’o ho di’ak, tanba komunidade sira moris iha to’os no natar nia laran, maibé iha preokupasaun ida ne’ebé mak sira sempre ezije mak eletrisidade ne’e de’it, segundu mak estrada.
“Ita boot jornalista haree rasik, estrada tesik mai, maski kondisaun ladún di’ak, maibé transporte kontinua movimentu ba mai, entaun bele lori komunidade sira nia produtu ba fa’an iha sidade, agora preokupasaun maka’as liu mak eletrisidade, to’o ohin loron ami sei moris iha nakukun laran, kompañia balun lori ona besi riin mai harii tinan ualu, maibé instalasaun to’o agora seidauk”, hatete Xefe suku Mausiga, Guilherme Rodrigues Soares, ba Timor Post, iha postu administrativu Maubisi, munisípiu Ainaru, Kuarta (31/06).
Nia dehan, komunidade sira iha foho Kablaki nia hun, ne’ebé to’o agora kontinua uza solar panel ne’ebé mak tinan hirak liubá governu fahe ne’e, maibé eletrisidade seidauk tama nafatin, maski nia riin harii hotu ona, maibé seidauk halo instalasaun.
Tuir nia, riin eletrisidade inklui fiu sira hosi sentrál dada hotu ona dezde iha tinan hirak liubá, maibé tanba saida mak to’o agora eletrisidade ne’e kontinua la lakan nafatin ne’e mak nia parte mós kontinua hato’o preokupasaun komunidade sira nia ne’e ba iha membru governu sira.
“Riin eletrisidade ne’e sira mai harii dezde tinan ualu ona inklui fiu sira dada hotu ona, maibé ami hamutuk ho komunidade sira adora ka haree de’it mak riin sira ne’e ka nusa, tanba ne’e ha’u husu ba governu mai ne’e tenke halo lakan ona ami nia ahi ne’e, atu nune’e ami mós sente naroman hanesan maluk sira seluk”, nia salienta.
Nia subliña, tanba riin eletrisidade sira harii ne’e agora komesa tuan hotu ona no balun monu fali ona, maski seidauk uza ka ahi seidauk lakan, tanba kleur ona iha tinan ualu ona.
“Tanba ne’e mak preokupasaun hirak ne’e ha’u kontinua hato’o ba iha leten no governu foun agora mai ne’e ami husu haraik-an atu nune’e bele halo lakan ona eletrisidade mai iha Mausiga ne’e nune’e komunidade sira bele asesu ona naroman, hodi sente hanesan komunidade sira iha suku sira seluk ne’ebá”, nia husu.
Iha sorin seluk, komunidade Agostinho Mendonça, dehan, sente triste tebes, tanba riin eletrisidade ne’e sira mai harii iha suku laran hodi halo kontente sira, maibé prosesu ida atu lakan ne’e mak to’o agora halo sira sai triste.
“Hanesan komunidade sente triste tanba, iha tinan hirak ba kotuk sira nia harii Riin no dada fiu ami hotu kontente, tanba garantia tempu badak bele asesu ona eletrisidade, maibé realidade halo ami sai triste, tanba ahi la lakan to’o ohin loron”, nia hakotu.
1,155 total views, 6 views today
Bele hare Video Seluk :
Subscribe to Timorpost
