Dili (timorpost.com) — Programa Nasionál Dezenvolvimentu Suku (PNDS), iha Governu Daualuk nia Ukun, konsege hatuur ona prinsípiu ukun rasik an, atu liberta povu husi ki’ak no mukit.
Kestaun ne’e Sekretaria Ezekutivu PNDS, Claudinha Soares Pinto, hato’o ba Timor Post, iha nia kna’ar fatin edifísiu Ministériu Administrasaun Estatál (MAE), Kolmera, Segunda (06/03/2023).
“Ita-nia prinsípiu ida dehan, kore ita-nia povu husi ki’ak no mukit, liberta povu, liberta patria, ida ne’e maka agora lori hela ba ita-nia povu sira iha aldeia, Suku, Postu to’o Munisípiu”, nia hateten.
Programa PNDS iha ukun oitavu governu, identifika harii uma ba povu iha sira-nia hela fatin ida-idak, tantu hela iha foho leten, mota kuak ekipa PNDS buka to’o iha sira-nia fatin hodi harii uma ba sira.
“Ha’u hanoin katak Governu sira antes mós halo ona uma, maibé ida ne’ebé ita halo ne’e diferente, ita la lori komunidade sira husi bairru ida ba fali hela iha bairru seluk, ita kontinua halo uma iha sira-nia hela fatin, sira hela iha foho tutun ita to’o ba, sira hela iha mota kuak sira ne’e mós ita to’o ba, hakarak duni atu lori dezenvolvimentu ne’e ba ita-nia komunidade sira”, Claudinha hateten.
Bainhira PNDS harii uma kbiit la’ek ne’ebé daudauk ne’e nakfilak ba Uma Naroman ba Povu, la haree ba kór partidáriu, maibé uma ne’e ba povu tomak nian direitu ne’ebé konsagra iha Konstituisaun.
“Povu sira iha direitu atu hetan fatin dignu ne’ebé durante luta ba ukun rasik an, ita nia prinsípiu ne’ebé dehan kore ita-nia povu husi ki’ak no mukit”, Claudinha afirma tan.
Iha 2021, PNDS halo ona uma 1.254, ne’ebé kuaze benefisiáriu sira utiliza ona uma sira ne’e.
Nune’e mós, iha tinan 2022 Governu liuhusi MAE ho programa PNDS harii tan uma 5.000 iha territóriu Timor laran tomak.
Enkuantu iha tinan 2023 ida ne’e Governu kontinua harii uma naroman ba povu hamutuk 3.700 resin tan ba benefisiáriu sira iha territóriu Timor laran tomak.
Tuir planu antes mandatu oitavu Governu remata, tuir estimasaun PNDS katak, sei halo uma 10.000 ba benefisiáriu sira iha territóriu Timor laran tomak.
2,267 total views, 3 views today
Bele hare Video Seluk :
Subscribe to Timorpost
