DILI (timorpost.com) – Tanba sente tempu to’o ona atu mellora fatin turizmu sira, Parlamentu Nasionál (PN) husu Governu atu tau planu prioridade ba Área turístiku sira ne’ebé lokaliza iha Munisípiu Lautem.
Deputadu Alexandrino Cardoso da Cruz, hatete fatin turizmu hanesan Jaco presiza dezenvolve sai furak hodi bele atrai ema hotu tantu turista internasionál no nasionál sira.
“Ita-nia area turizmu, liuliu iha munisípiu Lautem ne’e barak, tanba ne’e husu ba Governu liuliu Ministériu Turizmu, Komérsiu no Indústria (MTKI), atu toma-responsabilidade ba fatin turizmu sira sai fatin ekonomia ba povu,” nia hateten iha Parlamentu Nasionál, Tersa (24/01).
Nia dehan, área turizmu sira atu sai di’ak MTKI presiza tau planu no programa oinsá bele potensializa fatin sira hodi bele atrai turista sira.
“Ita-nia planu atu halo dezenvolvimentu ba fatin turizmu ka fatin potensialidade sira atu bele ekonomiza liuhosi polítika dezenvolvimentu iha rai laran,” nia subliña.
Portantu nia dehan, fatin turizmu sira ne’ebé iha munisípiu Lautem mak hanesan, Jacó, ili-kere-kere, ira-lalaro no seluk tan, nune’e husu ba ministériu kompetente atu moderniza fatin sira ne’e sai fatin atrativu no fó ekonomia ba povu hotu.
Nia hatutan, iha area Turizmu hanesan ilheu Jacó, iha ne’ebá animal ka balada fuik sira, hanesan rusa, tuir loloos Governu bele potensializa sai fatin ekonomia, nune’e mós fatin turizmu hanesan ili-kere-kere, no ira-lalaro.
Iha parte seluk, Deputadu Antonino Bianco, hatutan fatin turizmu sira iha rai-laran, Governu tenke iha ona polítika ida, oinsá bele fó benefísiu ba povu.
“Ita-nia fatin turizmu ne’e barak, liuliu iha munisípiu Lautem, hanesan ilheu Jacó, ili-kere-kere, ira-lalaro, tanba ne’e husu ba ministériu kompetente atu tau planu prioridade hodi mellora fatin turizmu sira ne’e,” nia afirma.
Ikus nia dehan, fatin turizmu nu’udar fatin ekonomia ba ema, hanesan sidadaun iha sosiedade, atu bele kria dezenvolvimentu ida buras ba povu Timor Leste.
3,284 total views, 3 views today
Bele hare Video Seluk :
Subscribe to Timorpost
