Dili(timorpost.com)—Daudaun ne’e Inspetór Jerál AIFAESA, I.P. haruka ona naran Funsionáriu Kontratatu (FK) na’in-118 ne’ebé termina sira nia kontratu iha loron 31 fulan Dezembru tinan 2023 ba Ministru Koordenadór Asuntu Ekonómiku (MKAE).
“Ha’u lori naran funsionáriu kontratadu hamutuk na’in-118 ba aprezenta iha Ministru Koordenadór Asuntu Ekonomia (MKAE) Francisco Calbuadi Lay, maibé hein Ministru maka deside funsionáriu hirak ne’e nafatin servisu ka rekruta funsionáriu foun”, Inspetór Jerál AIFAESA, I.P. Ernesto Monteiro, informa ba jornalista sira iha edifísiu Matadouru, Tersa (20/02).
Inspetór esplika, AIFAESA, I.P. presiza funsionáriu tékniku hodi halo inspesaun no monitorizasaun fiskalizasaun iha terrenu hodi nune’e emprezáriu labele manipula presu sasán no labele fa’an sasán ne’ebé liu prazu.
Tanba ne’e maka AIFAESA, I.P. nia servisu ne’e rede luan tebes, presiza funsionáriu tékniku barak hodi bele kontrolu másimu iha terrenu atu nune’e bele halo servisu kontrolu, tanba daudaun ne’e funsionáriu permanente na’in-lima no hetan apoiu funsionáriu na’in-haat mai hosi Komisaun Funsaun Publika ne’ebé destaka iha ne’e hodi halo servisu administrasaun finansas.
“Maibé la halo fiskalizasaun iha terrenu, tanba ami la’ós funsionáriu tékniku hodi halo kontrolu sasán ne’ebé deskonfia prazu liu no kontrolu ba merkadu iha hodi nune’e negosiante labele manipula folin sasán”, Inspetór relata.
Tinan ne’e AIFAESA, I.P. rekruta funsionáriu foun hodi destaka ba iha RAEOA, maibé kada munisípiu ida koloka funsionáriu na’in-lima hodi halo monitorizasaun no fiskalizasaun iha terrenu hodi nune’e, negosiante labele manipula folin sasán.
4,470 total views, 3 views today
Bele hare Video Seluk :
Subscribe to Timorpost
