DILI (timorpost.com) – Relasiona ho problema entre Arte-marsias Persaudaraan Setia Hati Terate (PSHT), ho Arte Rituál 77, akontese iha Dili, Governu alerta sei la tolera joven sira atu haburas Krime iha Timor-Leste.
Ministru Prezidenziál Konsellu Ministru, Fidelis Magalhães, hatete problema ne’ebé mosu ona sei haree ba krime.
“Ita haree ba krime, maibé ita sei halo esforsu hotu iha rai ida ne’e, atu nune’e bele hamenus krime ka laiha krime”, nia hateten iha Palásiu Governu, Kuarta (07/09).
Nia dehan ba Joven sira, katak bele la kontente ka la konkorda buat ruma maibé la’ós liuhusi dalan ida krime.
Tanba ne’e, nia afirma buat ne’ebé Governu lakohi mak hamosu krime no estraga ema nia riku-soin, sunu ema-nia uma, ameasa ema seluk nia vida ka halakon sidadaun seluk nia vida.
“Maibé buat ne’ebé atualmente Governu halo ne’e mak atividade sira hanesan ne’e tenke para, ita tenke hakribi no labele fó fatin iha Timor-Leste,” hateten nia.
Nia hatutan, maski situasaun ne’e realidade akontese duni, maibé kulpa ba ema ne’ebé halo krime, no nia mak tenke responsabilidade ba nia an no atitude ne’ebé nia halo.
“Kulpa ba ema ne’ebé halo krime ne’e, se ha’u Ministru mak ba halo krime, ha’u Fidelis mak kulpadu,” hateten nia.
Tan ne’e atu fó hanoin fali katak, relasiona ho problema ne’e, komunidade sira iha kapitál tauk hodi halo movimentu tantu loron no kalan, inklui mós hakanek membru FALINTIL Forsa Defeza Timor-Leste (F-FDTL) ida iha Akadiru-Hun hafoin tenta atu hakalma Grupu rua tuda malu.
2,103 total views, 3 views today
Bele hare Video Seluk :