Dili(timorpost.com)— Prezidente Autoridade Munisípiu Ermera, José Martinho dos Santos Soares, hatete nia seidauk tun ba iha terrenu hodi haree programa reabilitasaun Kafe iha Munisípiu Ermera.
Prezidente Autoridade Munisípiu Ermera, hatete besik tinan tolu, nia husik hela Munisípiu Ermera no seidauk buka tuir rezultadu hosi fundu millaun 6 USD ne’ebé iha tinan kotuk Prezidente Repúblika apoiu ba programa reabilitasaun kafé, iha Munisípiu hotu inklui Ermera.
“Besik tinan tolu, ha’u husik hela Ermera, ha’u seidauk verifika filafali, maibé programa reabilitasaun kafé kontinua la’o nafatin, uluk iha ha’u nia tempu, apoiu hosi Governu Nova Zelándia no Korea ba iha programa reabilitasaun Kafé la’o, maibé kona-ba programa apoiu fundu hosi Prezidente Repúblika, loos duni iha apoiu ba reabilitasaun Kafé, maibé ha’u seidauk tun diretamente ba haree programa ninia impaktu direta ba komunidade agrikultór sira nian oinsá”, José Martinho dos Santos, hato’o informasaun hirak ne‘e ba Timor Post, Via telefone, Sábadu (10/02).
Nia dehan, Kafé iha Munisípiu kuaze tinan naruk la hetan reabilitasaun, maski kafé tama iha kategoria kafé tuan, maibé ho programa reabilitasaun ne’ebé governu apoiu fundu inklui parseiru sira nia tulun, duni rezultadu di’ak.
“Maibé ita seidauk ko’alia kona-ba rezultadu apoiu fundu hosi Prezidente Repúblika nian, rezultadu ne’ebé iha ne’e en jerál, iha fatin balun hatudu depois reabilitasaun iha duni rezultadu ba produsaun di’ak no fó fuan makaas liu kompara ho kafé tuan”, nia hato’o.
Hanesan, PAM Ermera konkorda programa reabilitasaun kafé ne’e, ba oin autoridade sei promove nafatin.
“Kona-ba ba fundu ne’ebé apoiu hosi Prezidente Repúblika, téknikamente hanesan ha’u ko’alia, maibé seidauk ba haree no seidauk hatene total fundu hirak mak momentu ne’ebá apoiu ba programa reabilitasaun kafé, maibé haree in jerál iha duni rezultadu di’ak”, nia subliña.
Nia informa, daudauk ne’e Munisípiu Ermera, kuaze populasaun preokupa ninia kafé oinsá tesi no hamoos, atu nune’e iha tempu udan hanesan ne’e kafé ne’ebé foun kuda no tesi bele moris di’ak ka.
Enkuantu PAM Ermera ne’e promete katak, tempu badak nia rasik sei tun ba halo observasaun direta iha terrenu hodi haree rezultadu reabilitasaun kafé. Tanba kuandu halo komparasaun kafé iha tinan kotuk liu ba iha fatin balun hatudu nia rezultadu pozitivu liuliu iha Postu Administrativu Letefoho no Ermera Antiga Postu Administrativu Hatulia B.
1,038 total views, 3 views today
Bele hare Video Seluk :
Subscribe to Timorpost
