DILI (timorpost.com)—Diretór Ezekutivu Luta Hamutuk (LH), José Alves da Costa hatete Timor Leste ukun aan tinan rua nulu resin haat (24) ona, maibé governu seidauk rona komunidade sira halerik ba bee moos iha kapitál Dili.
“Ha’u hanoin problema bee moos ne’e problema ne’ebé esensiál komunidade enfrenta tinan barak ona, maibé tanba saida mak governu la rona los komunidade nia halerik ne’e” dehan nia ba Timor post iha resintu LH Faról, Kinta-Feira (31/08/2023).
Nia haktuir, Timor Leste ukun aan tinan rua nulu-resin- haat (24) ona, maibé komunidade iha Dili barak sei hasoru dezafiu mak bee maran, dala ruma semana ida bee laiha, balun kanalizasaun seidauk di’ak.
“Agora daudauk Komunidade husi, Bekora, Manleuana, Tasi tolu inklui fatin seluk halerik ba bee moos. Governu presiza tau kestaun primária ba problema ne’e” dehan nia.
Nia hatete, Governu presiza identifika problema komunidade sira hasoru oinsá buka solusaun atu rezolve problema ne’e, para povu labele preokupa tan ho bee moos.
“Ita haree komunidade sira barak kanaliza bee moos ba too hela fatin. Ida ne’e hatudu sinál servisu BTL,EP seidauk másimu .Tinan 24 ukun aan kapitál Dili ki’ik oan, komunidade seidauk hetan bee moos ne’e moe boot ida ba ita,” Diretór Ezekutivu LH, José Alves da Costa kestiona.
Ho problema ne’e, LH husu ba Governu tenke aselera lalais, ho planu ne’ebé iha atu nune’e atende urjente importante liu mak komunidade sira liu-liu ba bee moos.
Husu mós ba parte BTL.EP atu nafatin esforsu hodi halo preparasaun integradu hodi mellora sistema bee iha Dili ba tempu naruk nian.
3,528 total views, 3 views today
Bele hare Video Seluk :
Subscribe to Timorpost
