DILI (timorpost.com) – Universidade Nasionál Timor Lorosae (UNTL) sei hahú inskrisaun ba estudante foun iha loron 12, fulan Fevereiru 2024, iha resintu fakuldade Ekonomia no Jestaun.
Vise Reitór Asuntu akademiku UNTL, Samuel Venancio de Sousa Freitas, hatete, depois anúnsiu rezultadu, komisaun asesu ensinu superior nian, ne’ebé mak publika ona naran lista iha loron 03 Fevereiru 2024, ho nune’e iha loron 12 Segunda feira to’o iha loron 23 Fevereiru 2024, UNTL sei hahú rejistrasaun ba estudante foun ba anu letivu 2024.
“Tuir kalendériu ne’e ita rejista estudante foun iha loron 19, maibé anúnsia rezultadu sedu, entaun ita mós dada tiha semana ida mai iha loron 12, no depois ita haree took alunu sira ne’e konsege remata ka Lae? no preparasaun ba diretór nivel tékniku administrasaun finansas, tanba selu aumesmu tempu, foti KRS selu aumesmu tempu, kuandu 23 hotu ne’e ita organiza fali orientasaun,” Samuel hateten ba Timor Post iha nia knaar fatin kampus Sentral UNTL, Sesta (08/02).
Tuir nia, ba estudante sira ne’ebé mak rejistrasaun foun ne’e tenke iha formulariu atu nune’e selu propinas, no sira ne’e mós la selu de’it iha banku maibé sira mós bele ba rejistu iha sukursal sira seluk, no munisípiu sira, atu nune’e fasilita estudante sira ho lalais.
“Ba alunus foun sira, kuandu foti ona formulariu atu selu propinas, tenke kompletu no estudante sira ne’e la’ós selu de’it iha banku maibé bele ba selu mós iha sukursal sira seluk, no bele mós ba munisípiu tanba iha munisípiu mós iha BNCTL, no dala barak selu hotu iha eskola entaun estudante sira barak ne’e sai fali problema,” nia hateten.
Nia dehan, estudante sira tenke selu uluk propinas mak foti resibu hafoin bele foti KRS, mak hahú NRE, mak hahú orientasaun molok ba sala de aula, no tuir orientasaun akademiku nian ne’ebé mak planeia iha loron 7-9, maibé ida ne’e konforme sira rejistu sedu.
“Molok ba aula tenke hahú ba orientasaun, ne’ebé ita nia orientasaun akademiku ne’e ita planeia ba iha loron 7 – 9, mais ida ne’e rejistu sedu, haree ba ema hotu rejistu ona, ne’e tama hotu ona, no sei konfirma balun ba ona fatin seluk ka maske sira nia naran publika ona iha jornal da repúblika, ita planu fali ba orientasaun,” nia dehan.
Tanba ne’e, agora dauauk foka oinsá mak rejistu ne’e la’o di’ak, tanba kada tinan, rejistu sempre mosu problema. Ho ida ne’e mak senadu no estudante mós sei akompaña ajuda sira fahe formulariu atu selu iha banku, atu nune’e ema labele hobur no se mak hetan ona formulariu bele ba selu ona.
Nune’e mós, nia dehan, ba estudante sira ne’ebé mak naran publika ona iha jornal da repúblika, ba tinan 2024, sei labele halo transferénsia tanba prosesu aprendizajen seidauk la’o.
“ba estudante sira ne’ebé mak hakarak atu transferénsia tenke liuhusi dalan, tanba agora seidauk bele halo transferénsia ho razaun seidauk eskola, no seidauk tinan ida oinsá mak bele transferensia uluk ona, ne’ebé ita tenke tuir regra ne’ebé mak iha, katak tinan tuir mai mak bele halo fali pedidu entre fakuldade atu bele halo transferénsia, karik fakuldade seluk aseita, ne’ebé transferénsia ne’e iha prosesu nia laran,” nia esplika.
No daudaun ne’e iha UNTL, iha tan departementu foun rua, mak hanesan, departamentu Sosiolojia no Siensia Floretas, no iha planu atu halo departamentu foun tenke liuhusi prosesu ida, tanba tenke aseita husi Ministeiru Ensinu Superiór Siensia no Kultura, ho ida ne’e mak uluk iha kursu 41, no agora aumenta tan rua entaun kursu hamutuk 43. No total estudante ba UNTL iha anu letivu 2024, hamutuk rihun 4 resin.
5,439 total views, 6 views today
Bele hare Video Seluk :
Subscribe to Timorpost
