DILI, (timorpost.com)— Feferasaun Futeból Timor-Leste (FFTL) gasta orsamentu kuaze rihun $20 USD, saugati de’it ba kongresu estraordinária ne’ebé realiza iha Hotel Timor, loron-Kuarta, 10 fulan-Janéiru tinan 2024.
“Ne’e kesalahan (sala-red) komisaun no komité eleitorál nian, ita tenke hahú fali buat foun, FIFA (Federation International Football Association) la fó ona osan, tanba ohin ne’e kuaze gasta osan rihun $20 USD, mais laiha rezultadu, kongresu mós kansela”, fonte FFTL, ne’ebé la temi nia indentidade infoma ba Tmor Post, hafoin problema iha kongresu FFTL, Hotel Timor, Kuarta,(10/01).
Fontes ne’e konta, nia lakohi ko’alia buat sira seluk ne’ebé akontese iha prosesu tomak durante kongresu, ne’ebé ikus mai sai problema tanba inkapasidade komisaun lidera kongresu ne’e.
Iha fatin hansan, Prezidente Asosiasaun Dili Oeste, Ipolito Soares, husu deskulpa ba públiku, tanba ho inkapasidade no inkonsisténsia husi komité eleitorál.
“Ami, priméiru husu deskulpa ba públiku tomak, liuliu ba alin jogadór sira, ba klubu, ohin kanselamentu kongresu ne’e akontese tanba iha inkonsisténsia husi komisaun eleitorál ne’ebé hola desizaun la serteza”, Prezidente Asosiasaun Futeból Dili Oeste, Ipolito informa, hato’o lamentasaun ne’e hafoin partisipa kongresu FFTL.
Nia hatutan, komisaun eleitorál nia desizaun muda tun muda sa’e, antes loron kongresu foti desizaun seluk, iha loron kongresu parte dader oin seluk, mai fali han meudia, tama fali oin seluk hodi perturba kongresu ikus mai kansela. Nune’e to’o fahe malu laiha serteza atu halo kongresu FFTL ou lae, maibé nia hatete, bele realiza fali kongresu foun maibé tuir regra FIFA ho AFC (Asian Football Confederation) nian katak tenke realiza husi zero.
“Ita iha mais nafatin para bele halo fali kongresu foun, mais tuir regra FIFA ho AFC nian katak, ida-ne’e tenke liuhosi zero fali, buat hotu foun, hatama kandidatu foun, rejistrasaun foun, iha delegadu foun”, Prezidenete Asosiasaun Dili Oeste ne’e esplika.
Nia hatutan, prosedimentu legál sira no normál mak ne’e, tanba ne’e nia parte sei konsolida nia membru hodi haree fali situasaun ne’e para avansa ou la avansa kandidatu ruma.
“Konsikuénsia hanesan ne’e ami tenke toma responsabilidade katak finansiamentu FIFA sei la fó no ami prontu para finansia rasik kongresu tuir mai”, Hipolito hatete.
Kongresu ba estrutura FFTL nian ne’ebé sei realiza iha tempu tuir mai, todan tula hela ba asosiasaun futeból sira, no nu’udar asosiasaun futeból tenke simu konsekuénsia husi konselamentu kongresu no prontu finansia kongresu tuir mai.(*)
3,159 total views, 6 views today
Bele hare Video Seluk :
Subscribe to Timorpost
