Dili(timorpost.com)—Avansadu Estranjeiru hosi Indonézia Yohanes Jehaman, hatama golu rua ba rede Assalam Fc, hodi lori nia ekipa Porto Taibesi hetan vitória ho score 3-0. iha Stadium munisipal Dili, Kuarta (15/03/2023)
Iha jogu primeiru parte nia apitu foin lian, ekipa rua hatudu kedas sira nia jogu ne’ebé mak furak, liuhosi sira nia preparasaun tékniku no tátiku sira ne’ebé mak sira halo hamutuk ho sira nia treinadór sira durante ne’e hodi hakarak manan jogu.
Tanba, ekipa rua mai ho prinsípiu ida katak, hakarak manan jogu refere, Assalam hakarak manan nune’e lidera tabela klasifikasaun enkuantu Portu Taibessi mós hakarak manan nune’e bele hadook-an husu zona mean ka zona degradasaun.
Nune’e parte rua mai kedas ho ritmu jogu ne’ebé mak aas hodi hakarak atinje sira nia objetivu hirak ne’ebé mak sira planeadu ona durante ne’e.
Maibé iha jogu primeiru parte ne’e ekipa rua halo esforsu hotu no ameasa ba malu ba rede ida-ida ninia adversáriu, maibé sorte di’ak seidauk monu ba sira ho sira nia forsa ne’ebé mak hanesan la konsege hatama golu ba malu to’o jogu termina primeiru parte laiha golu ruma mak akontese.
Tama fali ba jogu segundu parte ninia ekipa rua muda hikas sira nia tátiku estratéjia, inklui formatu sira, atu nune’e bele hetan oportunidade di’ak liuhusi sira nia jogadór sira atu hatama golu ba malu nune’e bele manan.
Iha ne’ebé estratéjia ne’ebé mak Treinadór Portu Taibesi, Miro Baldo Bento, halo ne’e susesu duni, nune’e nia ekipa konsege fura rede Assalam Fc ninia da-tolu hodi lori sira nia ekipa sai vitória nune’e mós hadau pontus tolu ba jogu loraik ne’e.
Enkuantu golu tolu ne’ebé mak ekipa Portu Taibesi hetan iha jogu segundu parte ne’e, liuhosi jogadór Edencio da Costa iha minutu (73), no golu rua seluk boron hotu hosi sira nia avansadu estranjeiru ida husi indonézia ho naran, Yohanes Jehaman iha minutu (50 no 90+6).
237 total views, 6 views today
