DILI (timorpost.com)— Xefe Ezekutivu Even2u, Luís Simões, hatete iha Fulan Maiu Kompañia Even2u sei realiza Festival Tasifest iha Portu Dili.
Tasifest hanesan festival ida ne’ebé mak hahú ho objetivu, lori juventude Timoroan hamutuk, atu hanoin kona-ba importánsia halo prezervasaun no konservasaun tasi nian, husi impaktu lixu no importánsia atu jere lixu didi’ak iha moris tomak.
Iha festival ne’e, sei involve mós artista múzika, Pintór no kultura ho kontribuisaun husi sira-nia kriatividade, bele lori hanoin ida pozitivu ba ema hotu.
“Ami loke festival ida ne’ebé mak hahú ho objetivu, lori juventude timoroan atu tau hanoin hamutuk, kona-ba importánsia halo prezervasaun no konservasaun tasi nian, no moos hanoin kona-ba impaktu lixu no importánsia atu jere lixu didi’ak iha loron-loron, atu halo ida ne’e ami iha hanoin atu involve artista múzika husi pintura no kultura ho kontribuisaun sira-nia kriatividade, bele lori hanoin ida ho mensajen ida ne’e ba ema barak liután,” dehan, Xefe Ezekutivu Even2u, Luís Simões,, ba Jornalista Timor Post iha nia knar fatin, Dili, Kinta (18/04/2024).
TasiFest hanesan festival ne’ebé organiza husi kompañia Even2u ho apoiu balun husi setór privadu sira.
“Ami iha fundu ne’e mak limitadu no moos depende husi ajuda parseiru sira mak sponsor, ami haree folin mak baratu liu mak ami bele fó atu ema kualkér bele hetan asesu ba eventu ida ne’e, ami-nia parseiru ne’ebé konfirma to’o agora 100% mak kompañia husi setór privadu, maibé ami sei diskute parseria ho instituisaun insanu, grupu joven sira balun, no ministériu balun mak demonstra interese ona atu suporta ita-nia semináriu no workshop ida ne’e,” nia relata.
Festival ida ne’e moos inklui semináriu kona-ba redusaun konsumu no jestaun plástiku no moos servisu ekolójiku no ekonomia azúl relasiona ba tasi maibé halo modelu inovadór, ba atividade.
“Ami envolve empreza timor oan balun no asosiasaun balun mak halo ona servisu relasiona ba tópiku ida ne’e, atividade ida ne’e sei realiza iha Cristo Rei, no ami moos atu halo workshop kona-ba arte sustentavel, halo resiklajen sasán atu halo arte no uza fali materiál sira ho maneira sustentavel no kriativu no moos kona-ba aktivizmu artístiku ami envolve artista timorense balun atu halo ida ne’e iha Jardim 5 de Maio,” nia tenik.
Festival TasiFest nia logo ho lenuk atu dehan katak, lenuk hanesan espésie ne’ebé sofre barak liu ba poluisaun iha tasi.
“Tasi, liafuan ida-ne’ebé signifika tasi iha lian tetun, mak liafuan ida-ne’ebé hatudu katak ideia ida-ne’e mak atu sai buat ne’ebé loos iha Timor-Leste, no tasi mak parte ida husi Timor no Timor-Leste tomak, tanba istória ne’e, liuhusi tasi mak timoroan sira hatene kona-ba mundu no mundu ne’e hatene Timor-Leste, liga ema, kultura, kostume no tradisaun sira, ne’ebé sai parte husi nasaun ne’ebé ita hotu hatene ohin loron,” nia dehan.
1,920 total views, 6 views today
Bele hare Video Seluk :
Subscribe to Timorpost
