Timor Post (19/08/2020)-Planu harii Parlamentu foun no harii uma estadu ba deputadu ba rai hectare 10 iha Hera-Metinaru hamosu reasaun barak hosi públiku. Públiku prefere hadi’a povu nia moris la’ós uma ba deputadu.
Hatán ba preokupasaun ne’e, atuál Prezidente Parlamentu Nasionál, Aniceto Guterres, hatete planu ne’e hahú ona hosi primeiru lejizlatura, eis Prezidente Francisco Guterres Lú-Olo no Fernando de Araújo Lasama (saudozu).
“Ideia ka planu atu harii edifísiu parlamentu nasionál ne’e la’ós ha’u mak inisia, maibé hahú kedas hosi primeiru lejizlatura eis Prezidente Parlamentu doutór Lú-Olo no eis Prezidente parlamentu Fernando La Sama sira prepara tiha kedas, nune’e mós iha Prezidente Vicente Guterres nian mós la kontinua, mai to’o prezidente Adérito Hugo, ha’u mós iha Kuarta lejizlatura ha’u tenta komu tempu badak Prezidente Adérito iha tinan ida resin de’it ha’u iha fulan 9 de’it iha hela hanoin atu kontinua ideas sira hosi anterior ba harii edifísiu parlamentu nasionál, to’o fali Prezidente Arão Noé nian mós prepara hela, maibé hotu-hotu sei dauk bele realiza” Aniceto haktuir ba públiku liuhosi konferénsia imprensa n iha sala konferénsia Parlamentu nasionál, kuarta (19/08).
Razaun hirak ne’e Aniceto konsidera iha nesesidade, tanba ne’e iha nia mandatu kontinua mós vizaun ida mais integradu kona ba espasu atu harii instala edifísiu parlamentu nasionál, hanesan mehi ida.
“Ha’u aprezenta tan vizaun ida ne’e, vizaun ida ne’ebé mais integradu iha laran ne’e tanba hanesan mehi ida, iha kompleksu nia laran ne’e bele mós harii rezidénsia ba deputadu sira, la’ós uma deputadu sira, harii klínika, iha restaurante no mini sentru komersiál sira hotu iha ne’ebá ho buat sira ne’e hotu sai kompleksu boot ida”, defende Aniceto.
Maski nune’e Prezidente Parlamentu lamenta tanba planu ne’e foin hahú maibé sai fali ba públiku nia preokupasaun.
“Envés ko’alia kona ba edifísiu parlamentu sai urjénsia maibé públiku nia reasaun ne’e ba liu rezidénsia ba deputadu sira, hanesan parlamentu atu kria tan fali priviléjiu ida ba deputadu” Aniceto hirus.(Jornalista Julio Salinas Soares)
1,189 total views, 3 views today
Oinsa Ita nia Reaksaun iha Notisia Nee?
You have reacted on “Planu Konstrui Parlamentu Sei Inklui Klínika, R…”
Bele hare Video Seluk :
Subscribe to Timorpost
