MANUFAHI—Traballadór hosi kompañia My Friend na’in tolu deskonfia hetan baku hosi joven sira balun iha Suku Babulo, Postu Administrativu Same, Munisípiu Manufahi, Sesta (31/05).
Traballadór Kompañia My Friend, Jeky de Deus konfirma, sira hala’o servisu drenajen husi diresaun Aidahaleu to’o edifísiu Polísia Eskuadra Same, maibé iha Sesta (31/05) joven balun iha Suku Babulo, Postu Administrativu Same, Munisípiu Manufahi, maka baku sira na’in-tolu.
“Maibé ami halo hela servisu iha ne’ebá hetan baku hosi grupu balun ne’ebé la simu ami atu halo servisu kona-ba drenajen”, Jeky de Deus, informa ba Timor Post iha Same, Domingu (02/06/2024).
Jeky dehan, akontesimentu refere akontese bainhira sira na’in-neen ne’ebé hala’o hela servisu iha terenu atu ba han meiudia, sira na’in-tolu uluk tiha ba han no sira na’in-tolu tuir fali.
“Bainhira ami na’in-tolu ne’e atu ba han maka sira lubuk ida mai ataka ami hodi baku to’o ami nia enjeñeiru lori ba baixa Dili”, nia esplika.
Nia subliña, problema ne’e akontese polísia tun diretamente ba iha tereinu hodi foti vítima ba iha eskuadra, maibé tanba enjeñeiru kondisaun grave entaun lori ba baixa hein to’o re-kooppera maka kontinua ninia prosesu sira ne’e.
“Ami na’in-tolu ne’ebé hetan baku ne’e hosi Munisípiu Ermera maka mai servisu iha ne’e tanba hetan kontratu hosi kompañia, dala-ruma sira la simu ami mai servisu iha ne’e maka joven sira mai baku ami ne’e, maibé prosesu hotu hein ami nia enjeñeiru di’ak maka foin rezolve”, nia haktuir.
Kona-ba kazu ne’e Xefe Suku Babulo, Postu Administrativu Same, Alice de Jesus Nunes, hatete akontesimentu ne’e, tanba de’it selu badan ho estandarte 5.00 USD kada loron ba servisu drenajen.
“Komunidade sira iha area refere hakarak servisu hotu, maibé tanba kompañia selu de’it 5.00 USD kada loron ho ida ne’e maka sira la satisfás hodi baku sira ne’e”, nia klarifika.
Tanba ne’e sira ezije ba tékniku atu hato’o ba Diretór kompañia hodi hasoru malu ho badaen sira atu nune’e bele responde sira nia preokupasaun katak estandarte 5.00 USD ba ami badaen sira ne’e merese ka lae, maibé tékniku refere hataan dehan Diretór la ba no sira kontinua lori ema seluk ba halo servisu.
Tan de’it hakarak aselera serbisu ho ida ne’e tékniku kompañia la atende badaen sira nia preokupasaun no lori fali ema seluk mai halo serbisu ho ida ne’e labarik sira la satisfás hodi foti asaun baku sira.
“Antes ne’e ha’u ne’ebé hanesan autoridade mós ezije ba kompañia atu buka solusaun ba preokupasaun ne’e, maibé parte tékniku hosi kompañia ne’e la liga ida. Nune’e iha semana liu ba tékniku ne’e rasik informa mai ha’u dehan komunidade impede projetu ho ida ne’e ha’u husu tékniku dehan di’ak liu atu hetan solusaun ne’e bolu Diretór kompañia mai hotu hodi ko’alia ho badaen sira hodi hetan tiha solusaun maka aselera fali servisu”, nia tenik.
“Situasaun hirak ne’e hato’o tiha hotu, ha’u hein iha sede suku tékniku kompañia ne’e la lori nia Diretór mai, maibé lori fali asuntu ne’e hato’o fali iha Eskuadra Polísia Same. Momentu ne’ebá ha’u mós iha hela eskuadra polísia ne’ebá ho ida ne’e ami mós ko’alia nafatin di’ak liu lori Diretór kompañia mai buka solusaun”, nia haklean.
Kompañia ne’e rasik durante ne’e atu tama iha are adores ne’ebá laiha enkontru ho autoridade hodi ko’alia hamutuk ho badaen no traballadór sira kona-ba osan ne’ebé atu selu badaen sira 5.00 USD ne’e bele ka lae, nune’e sira mós bele esklarese katak ida ne’e tuir sira nia kbiit no kapasidade, maibé sira nafatin aselera de’it servisu.
“Tanba projetu tama iha sira nia bairru, maibé ema ida seidauk tama ba servisu iha ne’ebá ho ida ne’e laiha solusaun hosi kompañia, ho ida ne’e maka labarik sira baku sira nia ema ne’e. Baibain badaen sira servisu ne’e selu 7.00 USD ba leten, maibé 5.00 USD ne’e la’ós ida lere duut iha dalan ne’e lae”, nia hakotu.
807 total views, 6 views today
Bele hare Video Seluk :
Subscribe to Timorpost
