Reportajen: Luis casmiro
MANUFAHI—Ministru Asuntu Parlamentár no Komunikasaun Sosiál (MAPKomS), Francisco Jerónimo rekoñese programa naroman ba suku balun ne’ebé lansa ona paradu, maibé molok termina mandatu sei funsiona hikas.
Programa ‘Naroman ba Suku” ne’e, buka atu lori informasaun ba nivel lokál, besik ba komunidade sira iha suku, hodi fó dalan ba komunidade atu hato’o sira-nia preokupasaun ka obstákulu sira ne’ebé mak sira hasoru, hodi aprezenta ba meiu komunikasaun nasionál sira, atu nune’e sira bele haree di’ak liután komunidade sira-nia preokupasaun ka obstákulu sira.
Programa naroman ba suku ne’ebé paradu maka hirak ne’ebé lansa iha tinan 2018-2019 inklui Suku Rotutu, Postu Administrativu Same, Munisípiu Manufahi no suku seluk iha munisípiu seluk.
Maski nune’e, Ministru Francisco komenta, sei rezolve problema hotu molok termina mandatu.
“Ita boot sira dehan loos, hanesan akontese iha suku Rotutu, Postu Same, maibé ha’u haruka ona ekipa tékniku husi ministériu ba haree no halo avaliasaun atu haree fallansu iha ne’ebé bele hadi’a hodi fó kontinuidade,” Francisco subliña iha nia intervensaun bainhira inaugura Rádiu Komunidade Komunidade hanaran Rádiu Proklamadór Francisco Xavier do Amaral iha Postu Administrativu Turiskai, Munisípiu Manufahi, Sesta (17/02).
Ba komunidade Turiskai, governante ne’e promete harii tan sentru informasaun ida iha Suku Fatukalo-Munisípiu Manufahi.
“Molok ha’u nia mandatu remata ha’u sei marka tan prezensa iha Turiskai hodi halo tan lansamentu ba Sentru Informasaun suku Fatukalo ninian,” Ministru Francisco salienta.
623 total views, 3 views today
