DILI, (timorpost.com)— Joven Ba Kristu (JBK) ohin, (12/02) realiza atividade Camp Joven ba Kristu iha salaun parókia Bekora ne’ebé akumula joven husi parókia rua mak hanesan parókia Bekora no Bedois.
“Objetivu husi atividade ida-ne’e hanesan formasaun báziku husi Joven Ba Kristu nian, ema hotu ne’ebé atu hola parte iha Joven Ba Kristu ne’e, ema hotu tenke tuir formasaun báziku atu ajuda joven sira ne’ebé ho karakter no mentalidade oioin. Ami tau hamutuk iha ne’e no oinsá forma sira iha espiritualidade, mentalidade no oinsá sai joven ne’ebé di’ak no fiar metin ba Na’i Maromak atu servisu iha sosiedade iha igreja no nasaun”, Responsável Lider Klaster ba D1, Patricio Soares Belo, informa ba jornalista Timor Post iha salaun parókia Bekora, Segunda, (12/02).
Nia hatutan, “Ami espera katak sira hotu nia prezensa bele kolabora ho di’ak, maioria sira ne’e la’os estudante de’it maibé barak liu universitáriu no sekundáriu iha oituan de’it, mesak karakter oioin de’it mak tau hamutuk iha fatin ida-ne’e. Ami laiha apoiu finanséiru husi doadór ruma maibé ami iha inisiativa rasik, liuliu ekipa mak halibur malu, ema ida hatama osan $2.50 sentavu, ne’e mak realiza atividade Camp Joven ba Kristu ne’e”.
Iha fatin hanesan, Xefe ba Camp JBK, Petronela de Jesus Gonsalves, informa preparasaun ba atividade Camp ne’e hahú iha fim fulan-Janéiru nian mai no halo preparasaun iha semana tolu nia-laran
“Ami fahe ekipa entaun kada ekipa hala’o ninia servisu, karik servisu ne’ebé loos ona, no ami mós akumula iha ne’e hanesan Joven ba Kristu katak joven sai hanesan Kristu no lori Kristu ne’ebé sira iha no Joven ba Kristu nia misaun hanesan harii kreda ki’ik ida ba ki’ak sira, ida-ne’e mak Joven ba Kristu nia misaun no vizaun”, Petronela esplika.
Atividade camp JBK ne’e partisipa husi membru hamutuk na’in-150, feto na’in-75 no seluk ne’e mane hotu.(*)
7,350 total views, 3 views today
Bele hare Video Seluk :
Subscribe to Timorpost
