Hakerek nain naran: Agostinho Piedade Babo
Hela fatin: Same, Manufahi
Email: agusbabo3108@gmail.com
Nasaun nebe forte nia ai-rin mak juventude. Juventude nebe autêntico, iha nia papel no nia funsaun nebe estratégico mak atu participa ativa ba processu desenvolvimento nasaun nian inclui mos iha processu nee nia laran juventude sira temque kuda iha ida-idak nia a’an espírito nacionalismo no patriotismo ba nasaun.
Jovem nebe forte no badinas, matenek no creativo mak ita hanaran esperansa ba nasaun no autor ba desenvolvimento nasaun nian. Juventude nudar agente reformador no transformador ba nasaun atu desenvolve nasaun liu husi edukasaun política no democratiasaun, recurso económico, sensibilidade iha sociedade, senso comum ba iha ambiente moris nian, iha conhecimento nebe klean iha aspecto ciência no tecnologia, arte no desporto, cultura no civilizasaun humana no sai mos lideransa ida nebe bele lidera nia a’an rasik no nia maluk joven sira seluk ho responsabilidade no moral.
Juventude tem que iha papel nebe ativa nudar forsa moral, controlo social, no agente mudansa ba iha aspecto desenvolvimento nacional. Papel ativo juventude nian nudar forsa moral hanesan forma ida nebe importante no vital teb-tebes iha aspecto ética no moral iha dimensaun moris juventude nian.
Juventude iha espírito atu hametin no haburas fiar iha Maromak, hametin espírito mental no espiritual nian no mos eleva eh hasae ita nia consciência hodi respeita lei no ema seluk nia liberdade no mos ema seluk nia direito iha sociedade.
Controlo sosial iha círculo no âmbito juventude nian bele forma no haforsa percepção no hamosu iha ita nia consciência atu iha responsabilidade, direito no dever nudar sidadaun, atu hamoris iha juventude sira atitude crítico ba ambiente hodi respeita lei no ordem, hasae participasaun iha formulasaun ba política público, garantia tranparencia no justo no mos facilidade atu acessu ba informasaun no edukasaun nebe integrado.
Valor nacionalismo juventude nian sai nudar alicerce ba nasaun nebe completo no compreensivo liu iha processo desenvolvimento nasaun nian. Hare husi valor democracia nian, contem sentido ida nebe klean liu katak soberania nasaun nian iha sidadaun sira nia liman, liu-liu iha juventude sira nia liman.
Sidadaun ida-idak iha liberdade no responsabilidade ba iha organizasaun governasaun nian, liu husi processu eleisaun nebe ita hili no fihir ita nia nai ulun sira atu ba tur iha parlamento no governu, hodi halo lei no executa rikusoin nasaun nian ba povu nia moris diak no desenvolve ita nia nasaun sai diak.
Hare husi aspecto igualdade nian, sidadaun hotu-hotu iha direito no dever hanesan iha lei nia okos no sidadaun hotu-hotu iha mos obrigasaun hodi cumpri lei no ordem nebe vigora iha nasaun la hare ba raça, cor, lian, relijiaun, strata social, etc.
Iha democracia nian, iha era democracia no democratizasaun, iha buat ida nebe importante no sai hanesan orgulho ba ita mak valor sira democracia nian nebe hanorin ema atu respeita ema seluk nia direito no ema seluk nia valor nudar ser humano eh nudar ema.
Wainhira ita entende kona ba democracia ita tem que hatene no conhece profundamente saida mak democracia no nia valor ba ita nia moris hodi nune’e ita bele uza democracia tuir dalan lolos. Iha processu hirak ne’e, democracia fo êmfase mai ita mak atu respeita lei no ordem sira. Tamba democracia nee mos tama iha ámbito lei nian.
Democracia hanorin ita atu moris tuir lolos constituição, atu promove no protege direitos humanos, fo valor ba lei no justiça nebe independente, fo orientasaun mai ita atu tuir eleisaun hodi hili no fihir ita nia nai ulun sira ho livre, justo no direta, tanto legislativo, Presidencial no lider comunitaria sira, fo liberdade mai ita atu expressa no hato’o ita nia hanoin no opinião pública, atu hili ita nia nai ulun sira nebe ukun eh governo ita iha governasaun ida nebe aberta, tranparente no responsivo.
Juventude nia papel no funsaun seluk nebe importante mos mak participa iha festa Democracia nasaun nian, atu sai futuro no viveiro ba lideransa hodi bele assume knaar no responsabilidade no mos sai autor no protagonista ba paz no desenvolvimento nasaun nian.
Juventude mak autor ba dame, dame hahu husi fuan manifesta iha hahalok ka lalaok moris nian iha sociedade. Atu sai juventude exemplar ba ema seluk. Juventude mak lalenok ba labarik sira nebe sei kiik atu banati no moris tuir.
Tamba iha nasaun nia laran, juventude mak ai-rin forte nebe tuba no tane nasaun nia futuro. Aman-inan sira sai hanesan conselheiro no educador ba juventude sira no labarik sira nebe idade husi tinan 16 ba kraik.
Juventude sira tem que sai mata dalan ba dame, liu husi ação no atitude moris nian nebe iha ambiente dame nian iha sociedade Timor-Leste. Iha processu política nian, hanesan iha campanha eleitoral sira, juventude sira temque hatudu ka manifesta sira nia qualidade educativa hodi labele monu ba laço lider política sira nian nebe halo juventude sai hanesan meios ba lider político sira hosi partido no Bloco sira atu tau juventude nudar autor ba conflito maibe juventude temque tau a’an nudar autor ba dame no autor ba desenvolvimento nasaun.
Atu remata artigo ida ne’e, hau hakarak alerta no apelo ba hau nia maluk juventude sira, feto no mane atu matan moris neon nain nafatin, hodi prepara a’an didiak nudar jerasaun foun nebe forte atu forma ita nia a’an ba harí’i ita nia nasaun no ita Igreja nebe forte no fiar nain iha Maromak.
Jovem forte nasaun no Igrerja Forte. Muda ita nia a’an no hadook-an husi conflito, haburas democracia, hametin fiar iha Maromak, hadomi ita nia rai, liu-liu soberania nasaun nian. Respeita ema seluk no respeita ita nia a’an, valoriza ita nia cultura, badinas estuda no hasae nafatin ita nia qualidade no capacidade intelectual hodi sai autor ba desenvolvimento no autor ba dame iha Timor-Leste.
Juventude mak futuro no ai-rin nasaun nian. Hamoris espírito patriotismo no nacionalismo iha ita nia fuan hodi hateke ba kotuk aprende husi fraqueza no lição nebe ita falha iha passado no hakat ba oin ho matenek no aten brani atu muda no transforma Timor Leste sai diak no próspero liu husi democracia.
1,605 total views, 3 views today
Bele hare Video Seluk :
Subscribe to Timorpost
