DILI (timorpost.com) – Sekretáriu Estadu Protesaun Sívil (SEPS), Joaquim Amaral Gusmão, hatete sira apoiu ona nesesidade bázika ba Vítima Inséndiu Merkadu Taibesi, maibé la apoiu material konstrusaun, tanba fatin ne’e atu halo negósiu la’ós hela permanente.
Nia hatete, akontesimentu inséndiu Merkadu Taibesi iha loron (22/12), SEPS identifika uma-kain 54 ho ema na’in-416, mak hetan apoiu emerjénsia, maibé labele apoiu material konstrusaun tanba ne’e fatin merkadu.
“Tanba merkadu fatin faan sasán, la’ós atu hela, bainhira kalan mak merkadu taka tenke fila ba uma, maibé ha’u haree hanesan sai fali hela fatin ne’e labele”, nia hateten ba Timor Post Online, hafoin simu graduasaun iha Sentru Konvensaun Dili, Kinta (29/12).
Joaquim dehan, Sekretáriu Estadu Protesaun Sívil apoiu vítima sira mak hanesan foos, bikan, kanuru, balde, biti, lona, inklui susuben ba labarik kiik oan sira, maibé material konstrusaun ne’e la apoiu.
Nia hatutan, karik akontese inséndiu iha fatin la’ós merkadu, normalmente apoiu material konstrusaun.
Tanba ne’e, nia dehan, hafoin akontesimentu ekipa SEPS identifika kedas ema barak mak halo kos iha fatin akontesimentu, bainhira kos na’in ba foho, ema kos mak sunu lilin sala karik ne’e mak ahi han hotu uma hirak ne’e.
975 total views, 6 views today
