DILI, (timorpost.com)— Rede Feto Timor Leste realiza workshop hodi valida peskiza ne’ebé Rede Feto hala’o tiha ona kona-ba ‘Heroina no Impaktu Média Sosiál’, ne’ebé hetan partisipasaun husi Sekretária Estadu Igualidade (SEI), Elvina Sousa Carvalho, no Sekretáriu Estadu Komunikasaun Sosiál (SEKomS), Expedito Dias Ximenes, iha salaun Rede Feto Faról, Dili.
“Peskiza rua ne’ebé mak Rede Feto halo, heroina no mós peskiza ba impaktu média sosiál, halo ona iha tinan 2023, ba peskiza heroina nu’udar kontinuasaun ba obra ka livru ne’ebé mak uluk Rede Feto ida OPMT (Organizasaun Popular Mulher Timor) mak inisia no hetan apoiu husi lider nasionál sira. Lider nasionál sira hotu fó apoiu liuhosi angariasaun ida no ikus mai bele halo peskiza ne’e ba inan feto sira hotu iha teritóriu tomak kona-ba sira-nia partisipasaun iha luta libertasaun nasionál”, Diretora ezekutivu Rede Feto, Zelia Fernandes, informa ba jornalista sira iha edifísiu Rede Feto Timor-Leste, Faról, Sesta, (09/02).
Nia haktuir, livru ida-ne’e mak hanaran ‘Buibere Hamrik Ukun-Rasik-An’, atu fó kontinuidade ba ida-ne’e, Rede Feto aplika ba iha fundu sosiedade sivíl hodi halo ki’ik liután livru ida-ne’e ba iha profile heroina sira-nia. Ho tempu ne’ebé badak tebes kuaze fulan 4 de’it, Rede Feto kontinua halo peskiza kona-ba heroina sira.
“Ita iha tiha ona heroina sira ne’ebé presta ona sira-nia informasaun iha livru Buibere Hamriik Ukun-Rasik-An, serteza foti informasaun básiku balun husi ne’eba maibé komu modelu peskiza ida-ne’e la’os ba hakerek profile pesoal de’it maibé profile heroina ho koletividade, entaun agora prosesu la’o hela no besik atu finaliza ona, iha peskiza ida seluk mak hanesan peskiza impaktu média sosiál ba iha sosiedade, iha tinan 2023 hetan mós fundu husi sosiedade sivíl. Ba peskiza ida-ne’e propoin halo iha munisípiu 4 hanesan iha Dili, Baukau, Manufahi no Ermera”, nia haktuir.
Nia esplika, peskiza ne’e tanba-sá munisípiu 4 ne’e tanba alvu ne’e ba iha estudante ensiñu báziku 3o síklu no mós ensiñu sekundária no universitáriu, entaun populasaun ne’ebé mak hili ba peskiza ne’e tenke haree ba iha hili, kahur no haree iha universidade iha munisípiu ne’ebé mak iha.
“Ita konsege halo peskiza ne’e ba iha alvu diferente 4 (munisípiu 4) ne’e estudante ensiñu básiku 3o siklu, ensiñu sekundária, ensiñu superiór no adultu sira. Husu mós adultu sira-nia hanoin kona-ba impaktu media sosiál”, nia akresenta.
Workshop ne’e partisipa mós husi parte Konsellu Imprensa reprezenta husi Konseleira, Isabel M. F. de Jesus, inklui funsionáriu no parséiru Rede Feto sira seluk.(*)
960 total views, 6 views today
Bele hare Video Seluk :
Subscribe to Timorpost
