ADVERTISEMENT

Autoridade Betanu no Amigu Sente Triste Lakon Sarjento Abrão

Mateus da Cruz - Jeral · Manufahi
Jornalista : Luis Casmeiro
Editor : Mateus da Cruz
  • Share

MANUFAHI–Polisia Nasionál Timor-Leste (PNTL) komandu polísia munisípiu Manufahi lakon ninia membru sarjentu Abrão Mendonça ne’ebé destaka hanesan Ofisiál Polísia Suku (OPS) iha suku Betano, postu administrativu Same, munisípiu Manufahi.

Kona-ba kronolojia, xefe suku Betano, postu administrativu Same, Filipe de Araújo haktuir, saudozu nia mate oinsá ne’e nia parte lahatene maibé ba ho kondisaun toba hela ona.

ADVERTISEMENT
SCROLL FILA BA NOTISIA


Nia dehan, iha dadersan nia mak tiha Same no iha tuku 2 fila fali ba Betano nune’e iha dalan xefe aldeia ho komunidade para iha dalan hodi fo hatene hela dehan komunidade ida problema uma kain ida laen baku nia feen kaben.

Ba situasaun ne’e presiza tebes Ofisiál Polísia Suku (OPS) nia prezenza atu hodi mai hakalma problema komunidade uma kain ne’e ninian. Nune’e iha tuku 03 lokraik hakat ba OPS nia serbisu fatin atu bolu OPS.

“Hafoin haree tiha situasaun ne’e ha’u kontaktu ba OPS kuaze dala 9 maibé OPS la foti nune’e ha’u ho kareta ba too nia serbisu fatin postu Betano. Iha ne’ebá haree matebian nia ain mak sai hela mai liur no isin toba hanesan kondisaun mate hela ona,”haktuir xefe suku Filipi ba Timor post iha Tutuluro, Kinta (02/08).

“Maibé bainhira ho kareta ba ami iha de’it kareta laran no ha’u koko klakson kareta dala 5 atu nune’e OPS hader mai ami atu ba atua problema ne’ebe akontese. Maibé klakson dala lima ne’e laiha relasaun ruma husi matebian. Ha’u tun husi kareta ba hamriik iha odamatan bolu OPS dala 5 nia la book aan, ha’u hanoin nia dukur ha’u koko telefoni tan no telefoni lian hela maibé nia la foti,”nia esplika.

Lee Mós :
'Apointment Ne'e Nia Mandatu Hotu, Hotu ona'

Ho situasaun ne’e hare matebian nia toba ne’e la dada iis no hirus matan iis la book aan, neduni ho truama ba bolu fali komandante F-FDTL postu Betano ho membru nain rua mai hare no bolu Doutora ba hare mós labele ona no kondisaun mate ona.

“Kona-ba kondisaun mate oinsá ne’e, ita lahatene maibé ami ba hare nia laran hela ho kondisaun iis laiha ona. Neduni husi problema komunidade ninian ne’ebé iha mak ami hodi ba hetan OPS nia mate, se problema ne’e mak laiha dala ruma ita lahatene nia mate”nia esplika.

Nune’e xefe suku rekoorda katak, matebian destaka hanesan OPS ba suku Betano hanesan OPS iha tinan 2018 hamutuk ho ha’u iha Betano kuaze tinan 7 ho hafoin OPS nain rua ba destaka la kleur.

“Situasaun ne’e, hanesan autóridade Betano sente triste tebes, tanba tinan naruk tebes serbisu hamutuk ho nia, nia ema ne’ebé serbisu ho vontade no forsa tomak hakarak servisu serbí povu Betano”nia sublina.

Filipi dehan, OPS ne’e durante destaka iha Betano, kuaze povu tomak iha rai Betano toman ho nia neduni ohin ho nia mate ne’e povu tomak hakilar no tanis hotu tanba derepenti de’it nia mate.

Lee Mós :
Tribunal Foin MK simu partidu rua

“Tuir informasaun ne’ebé saúde fó hatene katak, durante ne’e nia bá koko beibeik hela nia tensaun, maibé ita nia hare ema ne’e ema ne’e laiha tensaun”nia hakotu.

Nune’e tuir amigu ne’ebé durante ne’e toba hamutuk ho eskola hamutuk iha sentru formasaun kadetes akdemika Komoro iha tinan 2002 sente tristi bainhira lakon amigu di’ak.

Tuir amigu no tama akademia iha periodu ida, ajente xefe Fernando dos Santos ho númeru 11921 ne’ebé destaka iha simpang tiha, suku Daisua dehan, matebian durante destaka iha Betano hela iha ne’ebá mesak hela permanente iha Betano no toba meska iha ne’ebá.

Nia reafirma, matebian mai uma Tutuluro dala ruma tempu de’it no hela permanente iha serbisu fatin postu polísia Betano.

“Maibé ohin nia mate ne’e ami mós lahatene ida no ami rona fali informasaun husi komandante Naval postu F-FDTL Betano”nia dehan.

“Matebian ami tama serbisu hamutuk iha loron 7 fulan-Abril tinan 2002 tama ba formasaun akademika kadetes iha sentru formasaun Comoro Dili no Gradua iha loron 29 fulan-Junu tinan 2002″nia sita.

“Ami nain tolu ne’ebé tama serbisu dala ida no formasaun klase ida no hetan númeru ID tutuir malu mak nia mate tiha ne’e, hau númeru ID 11921, matebian númeru ID xefe11922 no kolega Abilio Vicente númeru ID 11923″dehan nia.

Lee Mós :
Prezidente Autoridade Munisípiu Baukau Louva AM IKS-PTL Klube Inner Power Suku Gariuai

Nune’e ajente xefe Abilio Vicente ho númeru 11923 espresa, iha tinan 2002 husi Manufahi ami nain tolu tama formasaun hamutuk ho klase ida deit.

“Ami sente lakon kolega di’ak no maluk serbisu hamutuk nune’e komandu PNTL mós lakon rekursu di’ak ida. Nia ema ne’ebé hahalok di’ak, respetozu no iha serbisu sempre fó hanoin malu”nia relata.

“Matebian durante ami hamutuk iha akademiku too serbisu nia ema ne’ebé hahalok di’ak, hirus lahatene, iha formasaun hela kuartu ida, eskola mós aula ida no hare malu hanesan maun ho alin”nia rekoorda.

Molok hakotu nia dehan, matebian mate ho deviza sarjentu tanba liu ba ami ba kompete hotu maibé matebian mak pasa ba sarjentu.

Tuir observasaun Timor post nota katak, saudozu nia mate isin tula ho kareta carro Funerariu, ne’ebé akomapana husi kolega, maluk polísia no F-FDTL inklui funsionariu no autoridade munisípiu no komunidade sira.

Matebian mate husik hela oan nain lima (5) ne’ebé kompostu husi oan mane nain 2 no oan feto na’in 3, nune’e oan mane daruak foin sai forsa F-FDTL iha tinan 2022.

 1,137 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Autoridade Betanu no Amigu Sente Triste Lakon S…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No