Baukau(timorpost)—Atu selebra loron mundiál ema ho defisiente, iha Sábadu (2/12) semana kotuk ADFTL (Asosiasaun Defisiénsia Fiar Timor-Leste) Baukau halo asaun karitativa hodi fó apoiu sasán nesesidade báziku ba nia maluk defisiénsia iha Postu Administrativu Baukau Vila no Venilale
Tuir Diretór ezekutivu ADFTL Baukau, José Frederico, objetivu hosi asaun karitativa ne’e hodi selebra loron mundiál ema ho defisiénsia kada tinan ne’ebé realiza iha loron 3 fulan Dezembru.
Nia esplika, asaun karitativa ADFTL nian halo tanba servisu hamutuk ho Gabinete Autoridade Munisípiu, Servisu Munisipál Ministériu Solidariedade Sosiál Inkluzaun, parseiru dezenvolvimentu hodi apoia nesesidade báziku ba benefisiáriu nu’udar sentidu domin ba malu tanba benefisiáriu husi xefe família rua inklui foin sa’e na’in-rua nia kondisaun la perimite atu partisipa iha selebrasaun loron mundiál ne’e.
“Ema ho defisiénsia ita labele tau sira iha kotuk maibé ita tau importánsia hanesan sidadaun sira seluk ne’ebé la’ós defisiénsia. Atividade sira ne’e ami hala’o hamutuk ho komisaun organizadora koopera hamutuk ho Gabinete Prezidente Autoridade Munisípiu, parseiru dezenvolvimentu no instituisaun governu sira ne’ebé iha Munisípiu Baukau,” dehan Jose ba Timor Post, Sábadu (2/11) iha Vila Nova Baukau.
Nia afirma, atividade seluk ne’ebé komisaun realiza hodi selebra aniversáriu loron mundiál ne’e iha munisípiu Baukau mak, misa agradesimentu, marsa ba pás ne’ebé hahú iha edifísiu Servisu Munisipál Ministériu Solidariedade Sosiál inkluzaun Baukau to’o resintu autoridade munisípiu Baukau hodi partisipa dada sa’e bandeira primeiru semana fulan Dezembru nian.
Benefisiáriu ema ho defisiénsia fíziku matan, José Elisio Locateli sente kontente tebes ho esforsu ADFTL nian bele servisu koopera hamutuk ho gabinete autoridade munisípiu Baukau no parseiru dezenvolvimentu sira seluk fó apoiu ona nesesidade báziku hodi aguenta ba tempu balun.
“Ha’u sente kontente tebes ho maluk Asosiasaun Defisiénsia Fiar Timor-Leste hamutuk entidade sira seluk mai to’o ha’u nia fatin fó sasán báziku tanba Asosiasaun envolve ema defisiénsia maibé mai ajuda ha’u nune’e ha’u husu agradese tanba sasán sira ne’e ami bele sustenta ba tempu balun,” dehan Jose.
Tuir identifikasaun ADFTL ema ho defisiénsia ne’ebé sai benefisiáriu ba asaun karitativa kompostu husi xefe família rua no joven na’in rua ho tipu defisiénsia hanesan fízika, psikolójiku iha suku Caibada, Suku Bui-bau, Suku Gariuai Postu Administrativu Baukau Vila no ida husi suku Fatulia Postu Administrativu Venilale.
Sasán bázika ne’ebé apoiu ba benefisiáriu sira mak hanesan fós kilograma 25 saku ida, mina sardina, manta, biti, susu dancow, sabaun, bikan, tasu no sasán bázika seluk tan.(#)
3,105 total views, 3 views today
Bele hare Video Seluk :
Subscribe to Timorpost
