DILI (timorpost.com)— Asosiasaun Jornalista Timor-Leste (AJTL) hamutuk ho Oxfam Timor-Leste halo lansamentu ba estabelesimentu Sentru Mídia hodi monitoriza durante prosesu debate Orsamentu Jerál Estadu (OJE) 2024 iha Parlamentu Nasionál (PN).
Alumni Parlamentu Foin sa’e Timor-Leste (APFTL), Remígia Aleixo Ximenes, hatete, Rede Koligasaun Agrikultura Timor-Leste mak rede ne’ebé envolve agrikultór, grupu ema ho defisiénsia, setór privadu, grupu feto no mane iha agrikultura, organizasaun juventude, LGBTQI, grupu kooperativa, movimentu sosiál, Organizasaun sosiedade sivíl no grupu sira seluk ne’ebé iha interese atu tau matan ba asuntu mudansa klimátika, feto no rai, sustentabilidade fiskál, no oinsá fó hanoin ba governu atu dezenvolve setór agrikultura no promove ekonomia diversifika ne’ebé sustentável no inkluzivu iha Timor-Leste.
“Rede Koligasaun ida ne’e konkorda hodi re-ativa no estabelese Sentru Mídia Iha Sekretariadu Rede ba Rai iha Faról, Dili, hodi monitoriza, akompaña no halo advokasia ba diskusaun sira kona ba debate Proposta Orsamentu Jerál Estadu tinan 2024. Sentru ida ne’e sei fasilita espasu ba ema no organizasaun oin-oin, atu fó sira nia hanoin no akompaña prosesu debate sira OJE tinan 2024 nian iha Parlamentu Nasional. Rede Koligasaun Agrikultura Timor-Leste mós husu ba Parlamentu Nasional no Governu atu halo debate ho kle’an, matenek ho kuidadu, hodi konsidera situasaun real ne’ebé agora daudaun Timor-Leste hasoru,” dehan Remígia Aleixo liu husi Konferénsia Imprensa iha fundasaun Haburas, Faról Kinta (07/12).
Porta Voz Rede Koligasaun Agrikultura refere ba proposta OJE tinan 2024 katak despeza estadu neʼebé la sustentável no la realistiku sei fo risku boot ba sustentabilidade rezerva Fundu Petrolíferu no finansas públiku iha futuru bainhira Timor-Leste la iha ona reseita husi kampu mina no gas ne’ebé Timor-Leste iha. Alende ne’e, problema seluk hanesan mudansa klimátika no feto no direitu ba rai tenke sai prioridade mós ba (IX) governu konstitusionál ida ne’e.
“Sentru mídia ne’e sei kontinua realiza konferénsia Imprensa, programa TV Talk Show, hala’o PODCAST, ba asuntu importante sira hakerek submisaun ba Parlamentu, fasilita media briefing ba jornalista sira, prepara estetementu konjunta no diskusaun nakloke ho jornalista sira kona ba análize Proposta Orsamentu Jerál Estado tinan 2024 no atividade importante seluk tan, “dehan nia.
Tuir Sentru mídia ne’e sei funsiona husi inísiu diskusaun Proposta OJE tinan 2024 iha fulan Dezembru tinan ne’e no sei kontinua monitoriza Ezekusaun Orsamentu Jerál Estadu ne’ebé hetan aprovasaun husi Parlamentu Nasional no Promulga husi Prezidente Repúblika.
885 total views, 6 views today
Bele hare Video Seluk :
Subscribe to Timorpost
