DILI (timorpost.com)—Embaixadór Plan Internasionál ba Foin Sa’e sira, Kay Olok Sword Gusmão komprometidu sei kontinua obra Kristy Gusmão nia misaun. No husu ba Foin Sa’e sira atu utiliza sosial media hodi aprende laos para atu defama ema seluk.
Deklarasaun ne’e hato’o husi, Embasador foun ba Foin Sa’e sira, Kay Olok Sword Gusmão hafoin asina nota Memorandu Entendimentu (MoU) ho PLAN Internasionál.
Kay Olok Sword Gusmão konta kuaze tinan 23, Kristy Gusmão hala’o misaun barak hodi fó tulun ba inan sira. Iha 2001 harii Fundasaun ALOLA sei eziste too ohin loron, hari mos HALIKU ne’ebé atu eduka feto sira kona ba proteje an husi kankru.
“Ha’u temi ha’u nia inan nia servisu tamba sa. Tamba hanesan mós ha’u nia inan, nia mós sai hanesan idola boot ida ba ha’u. Agora ha’u tenki agradese tebe-tebes ba PLAN ne’ebé fó oportunidade ba ha’u atu kontinua ha’u nia inan nia misaun. Ha’u espera katak liu husi PLAN nia programa ne’ebé agora daudauk lao hela, no sira nia program ne’ebé atu implementa iha futuru, hau bele ajuda ho buat barak no importante liu aprende buat barak husi sira, “dehan Kay Olok iha nia diskursu hafoin asina MoU ho PLAN iha Xanana Reading Room Bidau Lecidere Sesta (01/12).
Kay Olok, sente orgullu agradese tebes ba PLAN fó fiar ba nia no hili nia sai Embaixadór ba foin sa’e sira iha Timor tanba ne’e nia promete sei lori responsabilidade ida ne’e atu servisu ba joven sira hodi bele hetan oportunidade atu involve ho dezenvolvimentu iha rai ida ne’e.
Kay Olok mós ho hakraik an hato’o nia obrigado, no hakuak boot ba juventude sira suporta no liafuan murak husi joven Timor oan durante semana rua nia laran, ho liafuan sira ne’e mak fó motivasaun ba nia hodi bele hala’o servisu makas liu tan.
Foin sa’e Timor oan ne’e mós husu ba Joven sira ne’ebé iha era globalizasaun presiza utiliza maneira hotu, hodi aprende no mudansa tanba dala barak joven sira uza sosial media hanesan Facebook, dala ruma publika buat falsu no ho linguajen ne’ebé dala barak eduka.
“Mensajen ikus ba maluk Joven sira katak ho era globalisasaun ita hotu presiza utiliza maneira hotu, hodi aprende husi mudansa ne’ebé akontese iha mundu hodi bele aplika iha ita nia nasaun doben Timor Leste. Inklui mós liu husi social media hanesan Facebook. Ha’u bele hare no sempre akompanha iha Facebook katak ita sempre uza media sosiál atu trata mału no dala ruma publika buat falsu no ho linguajen ne’ebé la eduka. Nu’udar ambassador foin sa’e nian, ha’u husu ba joven sira mai vizita Xanana reading room hodi aprende buat ne’ebe di’ak husi livru duke gasta o nia tempu ba buat ne’ebe la vale,” Nia hakotu.
1,036 total views, 6 views today
Bele hare Video Seluk :
Subscribe to Timorpost
