DIILI, (timorpost.com)— Autoridade Protesaun Sivíl (APC – sígla Portugés ) liuhosi Sentru Nasionál Operasaun Protesaun Sivíl( CNOPC – sígla Portugés) relata relatóriu kona-ba dezastre naturál iha teritóriu Timor laran tomak ne’ebé akontese iha semana ikus afeita uma-kain hamutuk 12.
Diretór Gabinete Relasaun Externa no Komunikasaun iha APC, Anacleto Caetano, hatet, dadus dezastre naturál hirak ne’e rekolla husi loron 14 to’o 20 fulan-Novembru 2023.
“Dezastre Naturál ne’ebe akontese durante semana ida ho tipu tolu hanesan, ahi-han, anin sobu no udan boot, husi tipu tolu ne’e rejistu uma-kain ka xefe família hamutuk 12 mak afeta”, Diretór Gabinete Relasaun Externa no Komunikasaun iha APC, Anacleto Caetano, informa ba jornalista liuhosi konferénsia ba imprensa iha edifísiu APC Kaikoli-Dili, Segunda, (20/11/2023).
Dezastre naturias hirak ne’e akontese iha munisípiu 7 mak hanesn, munisípiu Dili, Ermera, Likisa, Maliana, Manatuto, Manufahi no Vikeke.
Iha munisípiu Dili, postu administrativu Nain Feto, iha suku Santa Cruz, aldeia 7 de Dezembru iha loron 13/11/2023, akontese ahi-han komuniade nia uma ida ka rua.
Iha munisípiu Ermera, postu administrativu Ermera, suku Talimoro, aldeia Liberti, iha loron 15/11/2023, akontese anin estraga uma ida, no mós postu administrativu Hatulia A, suku Manu-Sae, aldeia Bauna, anin estraga uma ida.
Iha munisípiu Likisa, postu administrativu Likisa Vila, suku Leotola, aldeia Lepa, iha loron 12/11/2023, akontese anin estraga uma lima, no mós iha munisípiu Manatuto, postu administrativu Laklubar, suku Xananain, aldeia Baharedo iha loron 14/11/2023, akontese anin boot estraga uma ida.
No iha munisípiu Manufahi, postu administrativu Same, suku Daisua, aldeia Riatu, iha loron 13/11/2023, akontese anin boot estraga uma ida, no mós munisípiu Vikeke, postu administrative Vikeke, iha suku Umak-Ki’ik, aldia Bahabunak iha loron 15/11/2023, akontese ahi-han uma ida.(*)
1,155 total views, 3 views today
Bele hare Video Seluk :
Subscribe to Timorpost
