DILI (timorpost.com)—Inséndiu iha Edifísiu Ministériu Administrasaun Estatál (MAE), maioria dokumentu la salva.
“Iha oras 12:18 ne’e ami sai kedas husi ami nia office ona, ami too mai iha ne’e ahi komesa ho eskala boot ona, entaun ami labele salva dokumentu sira ne’ebé, ami asegura de’it edifísiu sira ne’ebé mak besik hela,” Haktuir Komandante Korpu Bombeiru munisípiu Dili, Fernando da Costa, iha fatin akontesimentu Ministériu Administrasaun Estatál (MAE), Sesta (24/04).
Nia hatutan, iha kalan ne’e mak husik hodi salva dokumentu sira karik, ahi bele kontinua alastra ba edifísiu sira seluk. Tanba ne’e iha dadeer ne’e mós ahi kontinua rega, tanba ahi kontinua han.
“Ahi kontinua iha tan, dokumentu ho surat tahan sira ne’e mahar demais, entaun rega labele tama too laran, no ahi kontinua lakan,” hatuir nia.
Inséndiu ne’ebé akontese iha Ministériu Administrasaun Estatál (MAE) iha loron Kinta (23/03), maizumenus besik oras 12:00, Cobby house ne’ebé akomula Diresaun Nasionál, hanesan, Diresaun Rekursu Umanu (DRU), Unidade Protokolu Komunikasaun Informasaun Esternál (UPKIX), Diresaun Nasionál Organizasaun Urbana (DNOU), Unidade Asesoria Tékniku (UAT) no Inspesaun Jerál Ministériu Administrasaun Estatál (IJMAE).
Iha akontesimentu kalan ne’e kedas, Polisia Nasionál Timor Leste (PNTL), liu husi komandu Munisípiu Dili, halo intervensaun hodi lori kedas Traballadór Na’in-11 ne’ebé hala’o hela konstrusaun ba edifísiu ida foun iha aredór Ministériu Administrasaun Estatál nian.
Nune’e mós kalan ne’e kedas ekipa Bombeiru hala’o kedas atuasaun ba inséndiu ne’e hodi rega ahi ne’ebé halo uma ho intensidade makaas.
Tuir observasaun iha loron Sesta (24/03), dadeer, ne’e nota katak ekipa bombeiru nafatin kontinua rega ahi ne’ebé kontinua han dokumentu sira iha armáriu laran. Nune’e mós funsionáriu husi Diresaun ne’e labele halo sira nia knar hanesan baibain.
2,076 total views, 3 views today
Bele hare Video Seluk :
Subscribe to Timorpost
