Dili (Timor Post)—Governu Korea do Súl, liu husi Programa Saemaul Undong (SMU), hamutuk ho Programa Movimentasaun Hafoun Aldeia (PMOHA) hakarak dezenvolve nasaun Timor-Leste liu-liu Aldeia sira iha territóriu Timor laran.
Vise Diretór Saemaul Undong (SMU), HYeon-JU LEE hatete, programa Saemaul Undong moris iha Korea, ho objetivu atu hadi’a no halo dezenvolvimentu diak ba komunidade sira ne’ebe hetan difikuldade ba moris liu-liu ba komunidade sira ne’ebe mak hela iha area rurais sira.
“Programa ida ne’e mundu hotu-hotu kuaze hatene, maski Korea Súl hanesan nasaun ne’ebe mak dezenvolvidu, maibé nafatin lori programa SMU ida ne’e ba nasaun seluk, hodi halo dezenvolvimentu no halo mudansa ba ema nia moris ba bem-estar”, hateten husi HYeon-JU LEE ba Jornalista sira iha Edifísiu MAE, Kinta, (23/06).
Nia dehan, objetivu servisu hamutuk ho ministériu relevante liu-liu Ministériu Administrasaun Estatál (MAE) atu bele hatene populasaun no komunidade sira, hodi servi diak liu tan liu husi programa ida ne’e,
“Ha’u sente orgullu tebetebes, tanba liña Ministerial sira bele simu ami hodi konta istória uitoan, kona-ba lalaok SMU ho PMOHA iha Timor Leste, nune’e fiar katak programa Ida ne’e bele la’o ho diak liu tan”, Nia hateten.
Iha parte hanesan Vise Ministru Administrasaun Estatál, Lino de Jesus Torrezaun, hatete Governu Timor Leste entuziazmu tebes ho programa rua ne’e, ne’ebe mak hakarak hala’o mudansa liu tan ba iha Munisípiu, Postu Administrativu, Suku no Aldeia sira, hodi halo dezenvolvimentu ba komunidade sira nia moris, ida ne’e Governu agradese.
“Governu TL, sente admira tanba programa Saemaul Undong (SMU), ho PMOHA, hakarak la’o to ba suku no aldeia sira hodi halo dezenvolvimentu ida ne’e ita kontente”
Lino de Jesus hatete, husi programa rua ne’e dezenvolve ona iha aldeia kuaze neen (6), ho total orsamentu hamutuk 125 Mill USD, ba sira atu halo dezenvolvimentu diak ba moris komunidade sira iha Aldeia remotes.
Iha parte seluk, nu’udar Prezidente Saemaul Undong iha Timor Leste (PSMUTL), Idelta Rodrigues hatete, “Ha’u agradese tebe-tebes ba MAE, nu’udar responsabilidade másimu ba implementasaun SMU ho PAMOHA iha Timor Leste”.
“Objetividade husi programa ida ne’e atu armoniza ita nia populasaun sira hodi halo dezenvolvimentu no hadi’a no tulun ita nia komunidade sira nia moris iha aldeia no area rurais sira”
Nia afirma, Programa ne’e durante implementa ona iha Munisípiu Lautem, Postu Administrativu Lospalos, ne’e sai hanesan referénsia ba governu TL, hodi dekreta Lei númeru 23/2021, atu halo dezenvolvimentu iha nasaun laran.
Programa Saemaul Undong ho Programa Movimentasaun Hafoun Aldeia (PMOHA), nu’udar programa foun, ne’ebe mai husi VIII governu konstitusionál ho dekretu Lei númeru 23/2021 ne’e rasik,
“Ami iha rekursu limitadu husi programa sira ne’e, maibé ami iha konfiansa, tanba governu iha ona dekretu Lei, atu bele fó forsa ba Munisípiu, Postu Administrativu, Suku, no Aldeia sira, atu bele iha kriatividade hodi hadi’a moris diak, ida ne’e mak programa SMU ka PMOHA iha nasaun Timor Leste”. Nia hakotu
2,413 total views, 3 views today
Bele hare Video Seluk :