DILI-Negosiante iha merkadu Taibesi loron-loron aumenta ba bei-beik, tanba negosiante mai husi munisípiu 14 mak hala’o atividade negósiu iha merkadu refere, ne’e mak fatin la sufisiente hodi akumula negosiante hotu.
“Ami observa merkadu Taibesi ne’e negosiante kada loron aumenta, entaun fatin iha merkadu laran la sufisiente atu halibur hotu negosiante sira hodi fa’an sira nia sasán iha laran,” deklara Xefe Departamentu Servisu Kontrolu Jestaun Merkadu Munisípiu Dili, Gaspar da Silva, ba Timor Post iha merkadu Taibesi, Tersa (21/03).
Tanba ne’e mak negosiante barak uza fatin estasionamentu no troator leten provizóriu hodi fa’an sira nia produtu atu hetan netik osan hodi bele responde ba sira nia nesesidade família nian.
Maibé, parte servisu kontrolu jestaun merkadu nafatin kontrolu iha merkadu laran, atu nune’e negosiante sira labele ba fa’an fali sira nia produtu lokál no fa’an roupa iha fatin estasionamentu no troator leten.
Nia dehan, Governu liuhusi autoridade munisípiu iha ona planu ba oin harii merkadu foun iha area Manleuana nian hodi akumula negosiante ne’ebé fa’an sasán iha dalan protokolu halibur sira hamutuk hodi fan sira nia produtu hodi hetan osan.
Maibé planu ne’e seidauk fiksu, entaun hein de’it bainhira mak halo konstrusaun ba iha merkadu foun hodi akumula negosiante hodi fa’an sira nia produtu.
Nia haktuir, sira nia ekipa kada loron sempre kontrolu iha merkadu refere hodi bandu negosiante labele mai fa’an sasán iha troator leten fatin estasionamentu hodi impede fali transporte públiku sira labele para iha fatin refere hodi hatama reseita ba kofre Estadu.
Tuir dadus ne’ebé servisu jestaun merkadu halo levantamentu no foti dadus kona-ba negosiante ne’ebé uza balkaun iha laran hodi halo negósiu hamutuk 2.000-resin mak uza halo negósiu kompostu husi fan produtu lokál modo, ai-fuan fresku, no negósiu ki’ik fan foos mina, masin, rinsu no seluk tan.
Iha fatin hanesan, negosiante modo tahan, Elisa dos Reis, hatete nia parte ho ninia alin feto fa’an hamutuk iha balkaun ida, tanba fatin laiha, entaun sira na’in-rua tau modo no ai-fuan fresku hamutuk iha fatin ida de’it.
Nia dehan, moris iha Dili la fasil, tanba buat hotu ho osan mak halo buat hotu, tanba bee moos atu uza tenke sosa inklui pulsa eletrisidade nian no mós labarik sira eskola hotu obrigada hanesan inan tenke halo negósiu hodi hetan osan atu bele sustenta ba nesesidade família nian.
886 total views, 6 views today
