Dili (timorpost.com) – Akompaña atividade fahe hahán gratuita liuhosi video ne’ebé mak espalla iha rede sosiál facebook, ne’ebé konsege dada atensaun públiku nian inklui mós jornalista Timor Post, tanba atividade refere motiva tebes joven sira para oinsá hadomi no ajuda ema seluk.
Atividade karidade ne’e, afinál joven feto klosan ida ho idade 24 mak hala’o atividade ne’e ho ninia osan rasik hodi ajuda sidadaun Timoroan sira seluk iha kapitál Dili.
Joven feto isin mutin no fuuk been ne’e, iha ninia vizaun no misaun ne’ebé mak luan tebes, hodi hateke hetan ba ema seluk ninia nesesidade loron-loron nian liuliu kbiit laek sira tenke halo asaun karidade liuhosi atividade fahe hahán (nasi kotak) gratuita ba Timoroan sira iha Dili no munisípiu sira.
Joven feto ne’e mak se los????. Nia mak Sonia Mendonça Cabral, ne’ebé moris iha Dili, iha loron 02 Outubru 1998, jerasaun hosi munisípiu Baukau no Maubisse nian, hanesan Lisensiada Téknika Aviaun, ne’ebé remata ninia estudu iha tinan 2022 hosi Universitas Nurtanio Bandung.
Sonia maski sei klosan hela, seidauk hatene loloos harii família uma kain ne’e ninia todan no responsabilidade ne’e oinsá, maibé nia iha ona hanoin ida ne’ebé kreativu, para gasta ninia osan privadu hodi ba sosa foos no modo depois te’in, hotu ba fahe gratuita de’it ba sidadaun Timoroan sira ne’ebé tuur iha lurón no ema la’o ain sira iha sidade Dili.
Tanba ne’e, iha loron Kinta (19/01), mais ou menus tuku 15:00 OTL lokraik, jornalista Timor Post Orlando Oqui ho Marcos Fernandes hakat ba Sonia ninia rezidénsia iha Bekora hodi dada-lia kona-ba atividade fahe hahán gratuita ba ema seluk iha kapitál Dili laran.
“Buat ne’ebé mak motiva ha’u atu ajuda ema seluk, dala barak, ha’u haree ita iha Timor ne’e, labarik ki’ik-oan sira buka osan liuhosi fa’an mantolun, fa’an haas no ferik ho katuas sira ne’ebé ai-leba, ne’e idade sira ne’ebé la merese buka osan”, Lisensiada Téknika Aviaun hosi Universitas Nurtanio Bandung, Jawa Barat, Indonesia ne’e haktuir ba Timor Post iha ninia rezidénsia Bekora-Dili, Kinta (19/01).
Tuir alumni SMP SACROJES ne’e katak, labarik ki’ik-oan sira ne’ebé ho idade menór ne’e loloos tenke enjoy (menikmati) sira ninia tempu atu halimar no aprende buat ruma, la’ós ba buka fali osan hodi sustenta nesesidade uma laran nian.
“Hosi buat sira ne’e mak motiva ha’u ho ha’u nia família hodi ajuda ema seluk, maski ajuda la barak, maibé uitoan ne’ebé mak ami bele entaun ami bele ajuda duni”, Feto Bonita ne’e esplika ho oin hamnasa.
Oan feto boot hosi Hermenegildo Cabral no Madalena Mendonça ne’e dehan, hahán sira ne’ebé mak fahe ne’e nia (Sonia) ho ninia família mak ba sosa rasik iha merkadu, depois lori to’o uma te’in, hotu mak tula ba karreta hodi fahe ba maluk Timoroan sira ne’e.
Sonia afirma liután katak, iha semana kotuk liubá ne’e nia gasta osan hamutuk 300 USD ba leten hodi ba sosa foos no modo, depois konsege halo nasi kotak 300 mak ba fahe, hahú hosi kampus UNTL, Kolmera, igreja Motaél nia oin, Palasiu Governu nia oin no labarik ki’ik-oan sira ne’ebé treinu joga bola nian.
“Osan ne’ebé ami hasai ne’e nunka hanoin no nunka espera atu ema fó fila fali, maibé ita moris nu’udar ema loron ida ema seluk pasti ajuda fali ita. Tanba se ita hakarak ajuda ema entaun tenke ajuda duni, tanba iha ema seluk sei presiza hela ita nia tulun”, Alumni SMA Canossa ne’e hateten.
Joven feto klosan ne’e konta, bainhira ba entrega ka fó hahán ba maluk Timoroan sira ne’e, sira ninia liafuan ne’e mak “Agradese”, maibé iha ema balun hatete katak, fahe hahán gratuita ne’e keta tau ai-moruk ruma karik.
“Ami fó hahán sira ne’e depois ami esplika tuir katak, ida ne’e hanesan karidade liuliu foin lalais tinan foun ne’e, la’ós ami fahe de’it ba ema ne’ebé fa’an modo no labarik ki’ik-oan sira, maibé fahe mós ba estudante sira”, Sekretaris Anggota Keputrian Fakultas Teknik Universitas Nurtanio Bandung ne’e haktuir tan.
Nia klarifika katak, hahán sira ne’ebé mak enxe iha kotak laran ne’e kompostu hosi etu, naan manu, modo tahan hanesan modo mutin, raba-raba no tau mós ai-manas.
Feto dahuluk hosi maun-alin na’in-lima ne’e dehan, semana kotuk prepara nasi kotak hamutuk 300, depois ba fahe hotu kedas ba estudante sira no ema sira ne’ebé mak fa’an sasán iha jardín sira ne’e.
“Dezafiu ba ha’u nia atividade karidade ne’e mak bainhira ita ba fahe ema balun hateke ita hodi dehan katak eiiii…..ne’e hosi ne’ebé mak ne’e, keta partidu ruma karik no iha ema balun lakohi simu duni, maibé ha’u hatete ba sira katak ne’e ha’u fó ho laran”, nia klarifika.
Formandu media SMNEWS ne’e deklara, atividade karidade ne’e ba oin sei hala’o nafatin, maibé depende hosi saida mak nia (Sonia) ho ninia família iha, tanba ida ne’e sai hanesan motivasaun ida ba joven sira seluk para oinsá bele hadomi no ajuda ema seluk.
12,570 total views, 3 views today
Bele hare Video Seluk :
Subscribe to Timorpost
