Dili (timorpost.com) – Hanesan ajente ida servi ba nasaun liuhosi instituisaun Polisia Nasionál Timor-Leste (PNTL), kuandu uluk sei fíziku di’ak sempre preokupadu servi Estadu, maibé vida iha mudansa no muda realidade hodi lori realidade moruk ba Ajente xefe Maria Lourdes.
Horisehik, Iha oras tuku 9:00 jornalista Timor Post to’o iha pesoál ajente Xefe ne’e ninia uma iha Beto Leste, suku Madohi, postu administrativu Dom Aleixo, munisípiu Dili.
To’o iha nia uma jornalista foti matan hateke ba pesoál ne’e uza vestidu mean ho funan-funan ain tanan la uza xinelus tuur hela iha kadeira roda rua iha nia varanda. Sorte uitoan hetan netik kadeira roda apoiu husi Governu liuhusi Sentru Nasionál Reabilitasaun (CNR) Bekora tulun nia atu movimentu netik isin loloon iha kadeira leten durante tinan lima atu ba tinan neen.
Ajente Xefe Maria Lourdes lori lisaun hosi esperiénsia real. Nia sofre moras penyakit langkah ho naran seluk maka sindrome coilebrike hodi obriga ninia fíziku ida uluk livre movimentu ba mai hodi halo servisu oras ne’e tenke tuur de’it iha kadeira roda.
Ninia vida dependénsia ba kadeira roda hahú 2017 nia sei la’o no hamriik mesak maski tuur iha kadeira roda maibé to’o iha tinan 2018-2019 nia komesa isin tun kada loron no laiha forsa entaun nia tuur de’it iha kadeira roda mai to’o ohin loron la’o la di’ak no tuur iha fatin de’it atu han ka hemu no hariis, hatais, toba mós nia kaben ho nia oan sira maka atende hotu.
Jornalista koko konversa ho pesoál ajente ne’e maibé, pesoál refere labele ko’alia tanba ko’alia lian mós no lian la sai.
Ikus mai bele konversa ho ninia la’en kaben Francisco Alves hanesan komandante primeiru sarjentu polisia imigrasaun hodi konta kronolojia loloos moras ne’ebé nia fen kaben enfrenta iha tinan 2017 mai to’o ohin loron.
Enkuantu, moras refere hahú iha tinan 2017 ho sintoma maka liman mamar hotu no kidan mós mamar no lema mai to’o ohin loron.
Tanba monu iha situasaun ne’e sira la tuur de’it, maibé halo ona esforsu barak hanesan ba halo tratamentu iha Hospital Nasionál Guido Valadares (HNGV) no sosa ai-moruk Timor no sosa mós ai-moruk ho naran purtier plancenta ho folin 370 USD husi madre sira nia klínika hodi hemu de’it mós to’o agora seidauk rekoopera ba moras refere.
Durante ajente Xefe ne’e moras iha tinan 2017 mai to’o ohin loron ne’e pesoál PNTL no komandante munisípiu Dili no kolega seluk mós mai vizita no enkoraja no fó motivasaun atu nune’e labele sente mesak no labele triste no hanoin barak.
“Tanba ne’e tenke simu ho liman rua saida maka Maromak fó mai ita tenke simu maski moris ne’e todan hanesan naha boot, maibé nafatin agradese ba moris ne’ebé Maromak fó ba mai ita labele ta’uk no labele rende ba dezafiu ne’ebé ita hasoru”, sita La’en Kaben Francisco Alves.
Francisco haktuir, moras ida ne’ebé nia feen kaben hetan ne’e ai-moruk buka la hetan, maski durante halo esforsu ho objetivu hakarak rekoopera, maibé esforsu sira ne’e la konsege hatudu nia rezultadu.
Ho oin hamnasa polisia imigrasaun ne’e haktuir difikuldade ne’ebé ninia família hasoru ba Timor Post nakonu ho motivasaun katak nia fen kaben hasoru no enfrenta hanesan dezafiu maibé nunka hamate nia vontade tanba nia konsidera katak nia fen kaben sai inan ba nia no sai feton ba nia no sai kolega nian tanba servisu hanesan polisia ajente.
Nia konta, fou-foun nia fen-kaben maka servisu uluk hanesan PNTL entaun iha altura ne’ebá nia sei klosan nia la’o ba hare nia hean polisia ne’e (atuál ninia espoza) nia mós gosta ikus mai sira haburas relasaun domin to’o forma família iha tinan 2000 no rai oan na’in haat feto tolu mane ida.
No oan na’in-haat ne’e oan feto boot remata eskola husi Institutu Of Business (IOB) no oan mane daruak eskola Institutu Siénsia Superior Cristal (ISC) no oan da toluk eskola pre-sekundária IT Fomentu no oan ikun sei eskola pre- primária.
Enkuantu, tuir la’en kaben ne’e haktuir, buat hotu entrega ba maromak maka deside no tetu iha leten bainhira maka nia bolu ita ba tanba ne’e buat hotu entrega de’it ba maromak maka deside ita hein halo tuir de’it saida maka nia haruka.
Nia lembra konta, nia fen kaben sai polisia iha tinan 2001 ho kolega sira assume kargu boot hotu ona maibé tanba nia fen kaben ho kondisaun saúde ne’ebé la di’ak entaun hetan moras iha tinan 2017 mai to’o ohin la konsege rekoopera saúde.
Portantu maski nia fen kaben hetan moras maibé PNTL nafatin rekoñese nia kaben nia sakrifísiu iha tempu pasadu nian hodi fó nafatin saláriu kada fulan ba nia fen kaben hodi simu hodi sosa ai-moruk hodi halo tratamentu.
“Ha’u agradese ba governu no PNTL tanba nafatin rekoñese fó saláriu ba nia fen kada fulan sempre hetan hodi sosa ai-moruk hodi halo tratamentu no nesesidade seluk tan”, nia apresia.
Iha parte seluk, nia rekoñese durante nia feen kaben hetan moras nia sente difisil tanba atende ba servisu no mós atende ba nia fen kaben maibé nia sempre fahe nia tempu livre hodi atende tuir nesesidade ne’ebé nia fen kaben presiza.
Polisia imigrasaun ne’e haktuir, nia sempre fahe nia tempu dadeer ba servisu iha area portu Internasionál Komoro depois maka nia kaben presiza urjente entaun nia oan sempre telefone nia fila mai uma hodi atende ba nia fen kaben.
Tanba durante ne’e komandante polisia imigrasaun ho kolega sira hatene hotu nia fen kaben hetan moras penyakit langkah ho naran seluk maka sindrome coilebrike.
Enkuantu, Maria Lourdes moris iha loron 25 fulan Juñu tinan 1978 oan husi (Pedro de Carvalho) matebian no Paulina Pinto hanesan vida agrikultura ho nia maun alin hamutuk na’in neen kompostu feto rua no mane haat.
2,404 total views, 3 views today
Bele hare Video Seluk :
Subscribe to Timorpost
