DILI (timorpost.com) — Membru Parlamentu Nasionál (PN), husi Bankada Partidu Demokrátiku, António da Conceição ‘Kalohan’ husu Governu atu halo diferénsia ba subsídiu fim do ano 200 USD, ne’ebé fó ba kada uma-kain ho saláriu mês 13 (Gaji 13).
“Ha’u hakarak ko’alia kona-ba Governu, hodi diferénsia saida mak subsídiu ba família ho montante dólar amerikanu 200 ho salariu mês 13, ne’ebé anualmente la’o”, nia hateten iha Parlamentu Nasionál, Segunda (12/12).
Nia dehan, esplikasaun sira ne’ebé durante halo ba funsionáriu públiku ne’e, hanesan sente laran moras tebes, kuandu dehan saláriu dólar amerikanu 500 la simu 13 mês ne’e.
“Iha informasaun no ba ha’u ne’e baralla tebes, ha’u husu ba Governu bele diferénsia buat rua ne’e, ida seluk subsídiu tanba iha eleisaun ne’ebé liu ba, iha orsamentu ratifikativu mak Timor-Leste tau fundu espesifiku mós kona-ba subsídiu ne’e”, nia informa.
Ida la’ós atu invalida tiha diretu funsionáriu nian anualmente ne’ebé simu tiha ona, se ida ne’e mak akontese invalidu tiha ida ne’e, atu funsionáriu sira la simu sira nia salariu 13 mês ne’e Primeira-vez mak foin hamosu buat sira ne’e.
“Nune’e espera, Governu diferénsia ida subsídiu dehan subsídiu, para as familias, mais ida seluk ne’e subsídiu do funsionáriu, la’ós subsídiu hanesan nasaun hotu-hotu fó, ne’e ami husu Governu se bele tenke koordena desizaun sira ne’e,” nia afirma.
“La’ós tanba jeneraliza buat hotu-hotu, atu ema hotu-hotu manán boot, ema ne’ebé hanesan funsionáriu nia manán ne’e atu moris, la’ós nia manán para halo nia riku iha rai Timor ne’e, ne’ebé ha’u hanoin husu ida ne’e atu bele transmite hela ba,” Kalohan relata.
Iha fatin hanesan, Ministru ba Asuntu Parlamentares no Komunikasaun Sosiál (MAPKOMS), Fransisco Martins da Costa Perreira Jerónimo, hatán tuir nia hanoin ida ne’e polémika duni, porke lei rasik seidauk promulga, maibé ema mak halo promulga uluk ona.
“Iha lei rasik la dehan, funsionáriu públiku la hetan saláriu 13, hatete iha ne’ebá, funsionáriu sira hotu-hotu, Ajénsia sira hotu-hotu, só iha lei ne’e hatete, Asossiasaun Internasionál ne’ebé saláriu mais rihun 5 mak la hetan saláriu 13,” nia dehan.
Maibé, ida ne’e mós agora sei iha hela polémika, ami hanoin katak, lei ne’e mós seidauk promulga tanba hein Prezidente Repúblika, iha nia opiniaun rasik, ha’u mós hakarak rona Prezidente Repúblika nia opiniaun kona-ba Asesór Internasionál sira.
“Tanba tuir lei ou iha lei nia laran ne’e hatete nune’e, Asesór nasionais ho Internasionál ne’ebé nia saláriu menus husi rihun-5, iha direitu ida atu hetan saláriu báziku ne’ebé mai husi ninia level hanesan Diretór Jerál,” Fransisco dehan.
Nia haktuir, la’ós simu ida ne’e fulan-fulan nia simu kompletu ne’e lae, maibé simu ida saláriu báziku, tanba funsionáriu sira hotu-hotu, la simu salariu 13 mós simu saláriu báziku la’ós simu premulgasaun kompletu ne’e lae, ida ne’e iha lei hatete hanesan ne’e.
“Agora hein hela Prezidente Repúblika, nia promulgasaun bainhira mak nia promulga, maibé tanba interpreta tiha ho saláriu 13 ho subsídiu, entaun hotu-hotu iha direitu hanesan iha rua ne’e hotu, ne’ebé halo katak, subsídiu mós, tanba saláriu ne’ebé dólar amerikanu rihun 5 ba leten mós labele simu, nune’e salariu báziku mós labele simu, ne’e lae, funsionáriu hotu-hotu iha direitu atu ba simu, ida ne’e inklui orgaun seluk,” nia hakotu.
1,871 total views, 3 views today
