Jornalista Jaime Pires / Editór Noémio Falcão
Dili (Timor Post)—Ministru Justisa Manuel Cárceres la rekoñese akordu ne’ebé nia Vise José Edmindo Caetano assina ho Pelican Paradise Timor Leste ne’ebé mak realiza iha Novu Turizmu, Segunda (03/01/2021).
Ba Jornalista sira iha Palásiu Governu, Kuarta (05/01/2022), Cárceres hatete, la konkorda ho akordu ne’e bazeia ba akordu antes iha tinan 2010 katak hahú tinan 2017 Pelican Paradise tenke selu ona rai aten ba governu maibé to’o agora seidauk.
Entretantu akordu ne’ebé Vise Ministru asina dadauk ne’e arrendamentu fali rai ho totál éktare 556 iha Tasi Tolu, Dili ba investimentu Pelican Paradise.
Ministru Cárceres mos dehan, tuir loos nia mak tenke asina akordu ho investór sira la’ós vise ministru ka sekretáriu estadu.
“Kontratu ba arrendamentu ne’e só ministru de’it mak bele assina ne’e tuir lei, ne’ebé la partisipa iha serimónia assina akordu ne’e tanba lei, lei haruka ita la’o, lei mós haruka ita para,” Cárceres subliña.
“Ne’ebé kona-ba ida ne’e loron rua ka tolu tan ha’u fó solusaun ba Primeiru Ministru, tanba tuir akordu iha tinan 2010 katak hahú husi tinan 2017 Pelican Paradisse tenke selu ona rai aten ba governu maibé zero sira la selu,” dehan Cárceres.
“Ha’u la bá partisipa iha assina akordu no la assina tanba ha’u la konkorda ho parte balun husi saida mak hakerek iha akordu ne’e rasik, iha parte barak loos,” Nia deklara.
Nia hatutan, vise-ministru asina akordu ne’e la reprezentante nia, tanba tuir orgánika governu daualuk nian la permite vise-ministru no sekretáriu estadu toma medida ida ne’e.
“Laiha kordenasaun depois ba assina tanba hahú husi loron 03/01 ne’e ha’u tuur iha ha’u nia Gabinete to’o tuku lima lorokraik,” Cárceres dehan tan.
998 total views, 3 views today
Bele hare Video Seluk :