DILI—Selebrasaun loron Nasionál veteranu ba dala VI, ne’ebé realiza iha loron 03 fulan Marsu ne’e importante tebes ba Timoroan hotu, tanba Estadu atu dignifika inan-aman luta na’in sira.
Estudante Ativista Diretu Umanizmu, Nelson Roldão Xavier, hatete, loron nasionál veteranu ida ne’e estadu foti atu bele dignifika Inan ho Aman luta na’in sira.
“Komemorasaun loron nasionál veteranu, mai ha’u ne’e hanesan loron onradu ida ka loron ida ne’ebé mak estadu foti atu bele dignifika ita nia Inan-Aman luta na’in sira ne’ebé define ona sira nia pozisaun hahú husi tinan 1974 mai to’o 1999 hodi sakrifika sira nia-an tomak, tanba ne’e loron veteranu ne’e importante,” Nelson hateten ba Timor Post iha Faról, Sesta (03/03).
Tanba inan-aman luta na’in sira ne’e uza sira nia isin tomak no maneira hotu sira utiliza para oinsá bele defende estadu ida nia diretu hodi bele kore povu ida ne’e atu Timor-Leste sai nasaun ida ke demokrátiku.
Nia dehan, mezmu situasaun barak mak enfrenta, mais depois sira hakat liu ho sira ne’ebé mak mate ona no sira ne’ebé sei moris hela, ho objetivu ida atu defende ukun rasik-an, tanba ne’e ba loron ida ohin ne’e hanesan loron espesífiku ida ba veteranu sira hotu.
“Loron ohin mós nu’udar loron erói nasionál ida hodi sidadaun no povu tomak bele fó onra no glória ba sira ne’ebé mak mate ona inklui dignifika sira ne’ebé mak sei moris hamutuk ho ita,” nia afirma.
Enkuantu, selebrasaun loron nasionál veteranu ne’e atu refleta loloos katak, veteranu hotu-hotu ne’ebé mak uluk foti ona sira nia pozisaun hodi defende rai ida ne’e no ba sira ne’ebé sei moris hela, daudauk ne’e kontinua foti sira nia papél hodi bele kontinua ezerse sira nia obrigasaun ida para bele liberta povu ida ne’e husi mukit ho ki’ak.
Ida ne’e mak misaun importante rua ne’ebé maka uluk povu tomak hamriik hodi defende to’o ohin loron. Nune’e, iha loron importante ida ne’e, mensajen ida ba jerasaun hotu-hotu, hodi kontinua serbisu hamutuk, esforsu-an maka’as liután para bele atinji espíritu ida uluk Inan-Aman sira ne’ebé mak mate ne’ebé ko’alia hela ba iha rai ida ne’e, para oinsá liberta povu ida ne’e husi susar no ki’ak.
“Hakarak hato’o ha’u nia mensajen ba maluk estudante sira hotu no mós ba Timoroan hotu-hotu, lalika haree ba kór, labele halo diskriminasaun no ba rasa, ohin ita sai Timoroan ida de’it ba rai ida ne’e,” nia haktuir.
Tanba ne’e, hakarak husu ba maluk sira hotu, hametin nafatin nasionalizmu no patriotizmu, konsidera mós loron sira ne’ebé mak importante ba povu ida ne’e no rai ida ne’e.
2,169 total views, 3 views today
Bele hare Video Seluk :
Subscribe to Timorpost
