ADVERTISEMENT

Ho De’it Fa’an Has Suporta Oan To’o Universidade

Mario da Costa - Istilu Moris
Jornalista : Amélia Babo
Editor : Isabel Ermelita
  • Share
Juliana Barreto. Foto TP/Amélia Babo

Díli (timorpost.com) – Isin ladún mutin, inan-feton ida ne’ebé hatais kalsa levis badak to’o ain tuur, ka’us metan liman badak, no xinelus iha ain, ne’ebé la mo’e atu leva ninia produtu hodi haleu sidade Dili, husi dadeer to’o rai nakaras, loro bele manas, rai rahun suar hodi hafalun nia no udan been habokon nia, maibé nia nunka rende, tanba deit ho objetivu ida, maka hakarak suporta oan sira nia estudu, para ikus mai oan sira bele sai ema susesu, aleinde sustente mós ba nesesidade uma laran.

Nia maka, Juliana Barreto, negósiante movel ne’ebé kada loron leva no tutur has budu lori haleu sai-tama kintu-kantu kapital Dili, para oinsá maka ema bele sosa ninia produtu ne’e hodi hetan netik osan oituan para bele satan kabun familia uma laran no prinsipalmente suporta oan sira nia estudu, husi primária to’o universidade.

ADVERTISEMENT
SCROLL FILA BA NOTISIA


Portantu, iha dada lia ne’ebé Jornalista Timor Post halo ho feto badinas ne’e, konta kataknia hahú hala’o negósiu fa’an sasán ho la’o ain ne’e dezde sei ho idade ki’ik, nia fa’an modo la’o ain deit sai-tama merkadu no haleu Dili laran, para bele hetan osan.

No atividade ida ne’e, nia kontinua to’o nia rasik forma uma-kain to’o ohin loron. No karik uluk bainhira sei klosan, nia buka osan para bele sustenta nesesidade uma laran de’it, ajuda inan-aman, maibé depois de forma família no iha oan, entaun nia tenke servisu makaas liu tan, hetan osan nune’e bele suporta ba oan sira-nia nesesidade eskola.

“Ha’u toman ona ho atividade ne’e, maski loro manas, rai rahun hafalun hau, dala ruma hasoru anin no udan boot, maibé hirak ne’e la hamate hau nia vontade atu kontinua fa’an para hetan osan hodi selu oan sira-nia eskola husi primária to’o iha universidade, ho de’it fa’an sasán, hanesan has budu sira ne’e,” Dare oan ne’e haktuir kuandu dada lia ho Timor Post, iha area Kampung Alor, Tersa (10/01).

Lee Mós :
SEFOPE Haruka Tan Servisu nain 27 ba Korea

Tanba nia konxiénte, moris iha mundu ne’e la fasil, buat hotu la mosu deit nune’e, maibé liuhusi servisu, halo esforsu maka foin bele hetan moris diak, no bele suporta oan sira nia estudu aleinde han-hemu no nesesidade seluk uma laran nian.

“Forma família ne’e la fasil, satan ita iha oan barak, eskola hotu, enkuantu ha’u-nia kaben moras defisiénsia ain, tuur iha uma de’it, susar buka servisu, entaun hau maka sai hanesan aman hodi buka osan para sosa hahán ho selu oan sira nia eskola iha primária to’o universidade,” Inan Juliana haktuir.

Nune’e, mezmu ke moris ne’e la fasil, maibé nia lakoi rende ho situasaun no kondisaun ne’ebé iha, nia enkoraja an atu labele ta’uk no rende ba dezafiu hotu ne’ebé iha, koko halo esforsu liu husi maneira oi-oin, hanesan fa’an has budu ne’e, ho nune’e maka bele hetan osan atu sustenta ba nesesidade família nian.

“Has ne’ebé hau fa’an ne’e,sosa iha merkadu Taibesi, lori mai uma iha Fatu-meta, koa hotu, kahur ho masin no ai- manas, depois tau iha trofles masa, hotu tiha hau lori sai husi uma, iha tuku 9:00 dadeer, la’o hale’u sidade Dili, nune’e ema la’o karik hetan, nia bele sosa netik hau nia has budu ne’e,” Inan ho idade tinan 45 ne’e katak.

Baibain nia tutur has, lori la’o iha dalan públiku sira no mós ba iha eskola primária, pre-sekundária no sekundária sira iha Dili laran, nune’e estudante sira bainhira rekreiu, bele sosa netik ninia has budu ne’e, maibé depende, se loron manas, entaun ninia has budu ne’e ema sosa hotu, no bele hetan rendimentu 10 USD ba leten.

Kuandu tempu udan, Juliana konta, dala ruma ema ladún sosa entaun has budu la hotu, nune’e to’o hakarak ka lakoinia tenke fila uma ho la’o ain deit, no nia mós labele sosa ona hanesan modo, masako, masin inklui foos atu lori ba tein para familia han kalan nian, tanba has la folin.

Lee Mós :
Governu Aloka $700 mill ba Atividade 20 Maiu

“Ha’u sai husi uma, iha tuku 9:00 dadeer, depois fila uma iha tuku 6:00 lokraik, hau fila uma maka foin han netik etu bikan idaou ai-farina ou talas ruma han tiha para bele aguenta moris ne’e, loron tomak hau la han, to’o lokraik fila uma maka foin, loro-loron hanesan hela deit,” Juliana dehan.

Maibé, nia konta, kuandu nia fa’an has budu husi dadeer to’o meiudia, ema sosa netik entaun nia sosa biskuit oan ruma ho bee ruma para kalsu netik ninia kabun hodi kontinua fa’an to’o lokraik maka fila uma.

Kaben husi Duarte Mendonça ne’e, rasik uluk bainhira sei eskola iha primária Fatu-meta, hakarak sai madre, maibé tanba inan- aman kbiit la to’o, vida agrikultura,entaun remata primária, la kontinua ona ba pre-sekundária no sekundária, ikus mai nia deside hala’o negósiu kiik oan sira ne’e to’o forma uma kain mós kontinua servisu ida ne’e, to’o ohin loron.

Tanba ninia inan mesak maka servisu fó han sira, enkuantu sira nia aman ho kondisaun defisiénsia, entaun susar atu halo to’os,ne’ebé inan maka halo to’os, kuda modo depois lori ba fa’an iha merkadu maka foin hetan osan, ne’e mós depende ba sorte deit.

Ho kondisaun moris ne’ebé nia enfrenta, Juliana husu ba ukun na’in sira, atu ajuda netik nia ho ninia kaben ne’ebé moris ho kondisaun defisiénsia fíziku, labele halo servisu, tuur deit iha uma, nune’e difisil tebes ba sira nia família, tanba oan barak eskola hotu no ninia forsa no kbiit la to’o para bele sustenta oan sira ne’ebé iha ona universidade.

Lee Mós :
Eugenia Martins Toba iha Estrada Ninin Hodi Fan Sasán

Feto negosiante ne’e konta, oras ne’e daudaun nia oan sira eskola hotu maibé nia forsa la to’o atu selu oan sira entaun obrigada nia loron fan has budu la’o ain hetan osan atu sustenta ba vida moris loro-loron.

“Ha’u-nia oan sira eskola hotu, maibé hau nia forsa maka la to’o atu selu oan sira nia eskola, tanba sira ba hotu ona iha universidade,tanba ne’e, hau husu ba ukun na’in sira, tau matan no fó bolsu estudu ruma ba ha’u nia oan sira,nune’e sira bele kontinua eskola tanba ha’u kbiit la to’o selu oan sira hotu ba eskola universidade,” Inan Juliana halerik ba ukun na’in sira.

Nia haktuir, “Ha’u-nia kaben, ami na’in -rua eskola la to’o nivel boot, maibé ha’u hakarak, ha’u nia oan sira eskola hotu universidade, atu nune’e sira eskola hotu, bele hetan servisu hodi ajuda fali ha’u ho hau nia kaben, ami na’in rua nia hakarak maka ida ne’e”.

Enkuantu, Juliana ho nia kaben, forma uma kain ho idade ne’ebé kiik, menoridade foin halo tinan 12, forma ona familia,entaun sente difisil tebes moris ne’e.

“Ha’u forma familia, tanba inan- aman maka obriga, entaun hakarak ka lakohi, tenke kaben ho hau nia tunangan Duarte,” nia konta.

Portantu, Juliana rasik iha maun-alin na’in- tolu, sira na’in-tolu ne’e la eskola hotu, agora forma hotu ona família no iha oan hotu ona.

Nune’e mós Juliana, nia ho ninia kaben, sira iha oan na’in- 12, husi sira ne’e, balun sei iha primária,pre-sekundária, sekundária, enkuantu oan nain-rua boot, eskola iha Universidade Oriental Timor-Lorosa’e (UNITAL), Fakuldade Ekonómia,Departamentu Jestaun, no oan ida tan eskola iha Institutu Superior Cristal (ISC), Departamentu Enfarmajen.

 1,812 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Ho De’it Fa’an Has Suporta Oan To’o Universidade” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No